16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
SPORT
Shtatë gola në 8 ndeshje/ Kreshnik Uka beson te titulli me Malishevën
PiranjatPërditësimi i fundit 10 September 2026, 08:29
Kreshnik Uka po kalon një formë të shkëlqyer me Malishevën, duke u shndërruar në një nga lojtarët më të rëndësishëm të skuadrës në fillimin e këtij sezoni.
Sulmuesi 31-vjeçar, i transferuar nga Prishtina, ka shënuar shtatë gola në vetëm tetë paraqitje, duke përfshirë ndeshjet në Superligën e Kosovës dhe kualifikueset evropiane.
Malisheva ka bërë një nisje të fortë në kampionat. Pas katër xhirove, skuadra kryeson renditjen me 10 pikë dhe ende nuk ka pësuar humbje.
Uka vlerëson kontributin e të gjithë ekipit dhe stafit teknik për këtë ecuri, ndërsa thekson se Malisheva duhet ta ruajë ritmin nga ndeshja në ndeshje.
“Kam filluar mjaft mirë sezonin me gola duke i ndihmuar skuadrës. Momentalisht është një edicion interesant dhe pse është herët të vlerësohet. Padyshim që meritë është e lojtarëve dhe e gjithë stafit të trajnerëve. Besoj që duhet ta mbajmë këtë ritëm edhe më tutje”, deklaroi Uka për Telegrafin.
Objektivi kryesor i Malishevës mbetet sigurimi i një vendi që e dërgon ekipin në Evropë, por Uka nuk e përjashton mundësinë e një objektivi edhe më të madh.
“Normal, objektivi kryesor është dalja në Evropë, por pse jo edhe titulli kampion. Nëse e rrisim nivelin e paraqitjeve nga loja në lojë, me ndihmën e Zotit mund të shpallemi edhe kampion”, u shpreh ai.
Uka foli edhe për eliminimin nga Hiberniani në kualifikueset evropiane. Malisheva fitoi 2-0 në ndeshjen e parë në Prishtinë, por humbi 4-1 në sfidën e kthimit, duke u eliminuar me rezultat të përgjithshëm 4-3.
Sipas Ukës, diferenca në vlerën dhe përvojën e skuadrave ndikoi në rezultatin përfundimtar.
“Ka qenë ekip i madh si Hibernian. Në ndeshjen e parë kemi pas rezultat pozitiv, ndërsa në ndeshjen e dytë kemi mundur të paraqitemi më mirë. Mirëpo ata janë skuadër me vlerë shumë më të madhe sesa ne dhe besoj kjo e ka bërë dallimin mes dy ekipeve”, tha ai.
Sa i përket objektivit personal, Uka synon të vazhdojë të ndihmojë Malishevën me gola dhe asistime gjatë sezonit.
