Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
SPORT
Silvinjo i beson boshtit, rekorde dhe zhgënjime! Ftesa të çuara “dëm”
PiranjatPërditësimi i fundit 13 April 2026, 07:43
Shqipëria ka arritur dy suksese të mëdha nën drejtimin e trajnerit Silvinjo ku padyshim kualifikimi në Europian që në debutim ishte një arritje e madhe. Për pak, Shqipëria do të shkonte edhe në Botëror, por ëndrra për në SHBA u ndal në mes duke qenë se kuqezinjtë u eliminuan nga Polonia në gjysmëfinalen e “play off”-it.
Silvinjo nuk ka qenë ai trajner që ka pëlqyer të ndërrojë shumë lojtarë. Në ciklin aktual të Kombëtares së Shqipërisë, trajneri Silvinjo ka ndërtuar një skuadër me strukturë të qartë, ku një grup i vogël lojtarësh ka mbajtur peshën kryesore të ndeshjeve, ndërsa pjesa tjetër ka pasur rol më të kufizuar ose nuk ka marrë fare minuta. Të dhënat e grumbulluara tregojnë një ndarje të fortë mes titullarëve, dhe atyre që presin ende debutimin.
LOJTARËT ME MË SHUMË NDESHJE- Në krye të listës së lojtarëve me më shumë paraqitje në këtë cikël qëndrojnë emrat që kanë qenë më konstantët në përfaqësuese. Kristjan Asllani dhe Mario Mitaj kanë qenë ndër më të aktivizuarit, të ndjekur nga Nedim Bajrami dhe Thomas Strakosha, të cilët kanë pasur rol të rëndësishëm në ndeshjet kryesore. Po ashtu, pjesë e grupit me më shumë ndeshje janë edhe Berat Djimsiti, Ylber Ramadani, Elseid Hysaj, Jasir Asani dhe Qazim Laçi, të cilët kanë qenë thuajse gjithmonë të pranishëm në listat e ndeshjeve dhe në formacionet e Silvinjos.
LOJTARËT ME MË SHUMË MINUTA- Kur flitet për peshën reale në fushë, minutat tregojnë më qartë hierarkinë e skuadrës. Më i përdoruri është Kristjan Asllani me 2846 minuta, i ndjekur nga Mario Mitaj me 2553 minuta dhe Thomas Strakosha me 2332 minuta, që kanë qenë shtylla të padiskutueshme të ekipit. Në vijim renditen Nedim Bajrami me 2202 minuta, Berat Djimsiti me 1957 minuta, Ylber Ramadani me 1883 minuta dhe Elseid Hysaj me 1870 minuta, të cilët përbëjnë boshtin kryesor të skuadrës së Silvinjos. Në repartet e tjera, Jasir Asani me 1717 minuta, Qazim Laçi me 1645 minuta dhe Ardian Ismajli me 1392 minuta plotësojnë listën e lojtarëve më të përdorur, duke treguar një bërthamë të qartë dhe të qëndrueshme të Kombëtares.
LOJTARËT QË NUK DEBUTUAN- Në anën tjetër të skuadrës qëndron një grup i gjerë lojtarësh që janë grumbulluar nga stafi teknik, por nuk kanë arritur të regjistrojnë asnjë minutë loje në këtë cikël, të paktën në ndeshje zyrtare. Mes tyre përfshihen Jon Mersinaj, Adrian Bajrami, Andi Hadroj, Lindon Selahi, Alen Sherri, Odise Roshi, Ermir Lenjani dhe Feta Fetai, të cilët kanë qenë pjesë e listave të Kombëtares, por pa debutuar në fushë. Kjo situatë tregon qartë filozofinë e Silvinjos për stabilitet dhe besim te një grup i ngushtë titullarësh, duke kufizuar rotacionin dhe duke mbajtur një hierarki të fortë në përzgjedhjet e tij. Nga njëra anë kjo ka sjellë konsistencë në rezultate, ndërsa nga ana tjetër ka lënë një pjesë të madhe të lojtarëve në pritje të mundësisë së tyre.
LIGA E KOMBEVE- E ardhmja e Silvinjos në drejtimin e Shqipërisë nuk është e sigurt dhe pritet që të ketë ndryshim në pankinë, ndërkohë që në vjeshtë do të luhet Liga e Kombeve. Nëse Silvinjo qëndron, me shumë gjasa statistikat do të ndryshojnë, si të debutuesve, ashtu edhe ato për më të aktivizuarit, teksa ndryshimi i trajnerit mund të sjellë më shumë risi.
