L
Një plagosje me thikë ka ndodhur rreth mesditës në Durrës, në zonën e Shkozetit. Një i ri, rreth 25 vjeç, &eum...
SPORT
Silvinjo zvarrit Shqipërinë, Duka qartëson të ardhmen. Sot konferenca që sqaron gjithçka
PiranjatPërditësimi i fundit 17 Prill 2026, 09:01
Shqipëria mbylli kualifikueset e Botërorit me një eliminim në “play off” duke i dhënë fund në këtë mënyrë shanseve për të shkuar për herë të parë në Kupën e Botës.
Humbja në Varshavë ndaj Polonisë, jo vetëm që i dha fund shanseve të Shqipërisë, por e ka lënë tashmë skuadrën tonë në një udhëkryq duke qenë se nuk dihet ende se çfarë do të bëhet në të ardhmen me stafin teknik. Shqipërinë e pret një edicion në vjeshtë duke qenë se skuadra jonë do të marrë pjesë në Ligën e Kombeve dhe është momenti perfekt për të nisur një cikël të ri, me apo pa trajnerin Silvinjo në krye të stolit kuqezi. Ndërkohë, pritet që ditën e sotme të ketë edhe më shumë informacion në lidhje me të ardhmen e trajnerit në krye të stolit si edhe me të ardhmen e Shqipërisë.
KONFERENCA E DUKËS- Presidenti i FSHF-së, Armand Duka do të dalë ditën e sotme në konferencë shtypi duke nisur nga ora 12:00 në ambientet e stadiumit “Air Albania”, aty ku edhe do të jetë para mediave. Presidenti i FSHF-së do të flasë për të ardhmen e trajnerit Silvinjo, si edhe do të bëjë një rezyme të rrugëtimit të Shqipërisë në “play off”-in e Botërorit dhe të kombëtares në përgjithësi nën drejtimin e trajnerit Silvinjo.
Kontrata e trajnerit do të përfundojë në fundin e muajit korrik dhe në fillim të vitit, kur u vendos për rinovimin e saj, ishte menduar sikur Shqipëria do të shkonte në Botëror dhe me përfundimin e Kupës së Botës, do të përfundonte edhe kontrata për të cilën do të vendosej më vonë. Tashmë, gjërat kanë ndryshuar dhe eliminimi i Shqipërisë, është padyshim një peng i madh nga i cili mund të varet shumë e ardhmja e trajnerit Silvinjo.
PROGRAMI- Shqipërinë e pret një fundvit i ngarkuar ku do të marrë pjesë në Ligën e Kombeve në muajin shtator. Por, fillimisht kuqezinjtë do të kenë dy teste miqësore në muajin qershor dhe ende nuk dihet se kush do të drejtojë Shqipërinë. Fakti që kontrata e Silvinjos përfundon në qershor, bën të mendohet që braziliani do të jetë në krye të skuadrës por nëse vendoset për të mos vazhduar pas muajit korrik së bashku, atëherë do të ishin dy ndeshje miqësore që nuk do të shërbenin dhe do të ishin ndeshje boshe, pa përfitime.
Nëse Silvinjo vazhdon, padyshim që këto dy sfida mund t’i japin shansin për të provuar lojtarët më në formë të momentit si edhe risi për të pasur më shumë alternativa në muajin shtator e në vazhdim. Nëse stafi teknik vendos të ndryshohet, në qershor dhe në ndeshjet e Ligës së Kombeve, trajneri i ri do të ketë mundësinë ideale për të krijuar skuadrën që do të marrë pjesë vitin e ardhshëm në eliminatoret e Europianit të vitit 2028, duke pasur një skuadër më të konsoliduar dhe me emra të rinj, duke qenë se shumë prej lojtarëve të skuadrës aktuale, nuk do të jenë në Europianin e ardhshëm nëse Shqipëria arrin të kualifikohet.
Në epokën e Silvinjos, Shqipëria arriti të kualifikohet në Europian për herë të dytë në histori që në debutimin e tij ndërkohë që për herë të parë, kuqezinjtë ishin në “play off” të Botërorit. Vetë braziliani është shprehur se do të respektojë kontratën edhe pse emri i tij u lidh me një kalim të mundshëm në kampionatin brazilian ku mund të merrte drejtimin e Korinthiansit.
