Spanja përballë Francës në betejën për finalen e Botërorit, De La Fuente: Jemi të fortë dhe gjithçka është e hapur

Spanja përgatitet për sfidën më të rëndësishme të Botërorit 2026, ku përballë do të ketë Francën në gjysmëfinalen që vendos një nga finalistët e turneut. Trajneri i “La Roja”, Luis De La Fuente, beson se skuadra e tij ka forcën për të kaluar në ndeshjen finale.

Në prag të përballjes me Francën, De La Fuente e cilësoi gjysmëfinalen e Botërorit si një sfidë shumë të vështirë, pasi në këtë fazë kanë mbetur vetëm skuadrat më të forta të turneut.

Trajneri spanjoll vlerësoi Francën si një nga kandidatet për triumfin, por u shpreh se edhe Spanja ka cilësitë e saj dhe se të dyja ekipet kanë bërë përmirësime të rëndësishme.

Sytë e tifozëve do të jenë sërish te Lamine Yamal, i cili pritet të luajë një rol të rëndësishëm në këtë përballje. De La Fuente beson se talenti 19-vjeçar ende nuk ka treguar versionin e tij më të mirë dhe po kalon një proces normal rritjeje e pjekurie.

Në fokus është edhe kapiteni Rodri, të cilin trajneri spanjoll e konsideron një lojtar kyç për organizimin e skuadrës. Krahas tij, De La Fuente vlerësoi edhe mesfushorët Pedri, Fabian Ruiz dhe Zubimendi.

Për sa i përket gjendjes së lojtarëve të dëmtuar, Nico Williams dhe Victor Munoz janë rikuperuar dhe mund të jenë në dispozicion për sfidën ndaj Francës.

Spanja kërkon një tjetër paraqitje të fortë për të siguruar një vend në finalen e Botërorit, ndërsa Franca vjen me të njëjtin objektiv në një duel ku çdo detaj mund të vendosë fatin e ndeshjes.