Stoli i Italisë, Pep Guardiola del nga gara: Dua të kaloj më shumë kohë me familjen time

Pep Guardiola largohet përfundimisht nga lista e kandidatëve për stolin e kombëtares italiane. Ëndrra e madhe e Federatës Italiane të Futbollit nuk do të bëhet realitet, pasi tekniku katalanas ka konfirmuar se nuk ka ndërmend të rikthehet së shpejti në pankinë.

Në një intervistë të fundit, Guardiola u shpreh se ka zgjedhur të bëjë një pauzë për t’iu përkushtuar më shumë vetes dhe familjes. “Dua të kaloj më shumë kohë me fëmijët e mi. Babai im është 95 vjeç dhe kjo të bën ta shohësh jetën ndryshe. E dua punën time, por tani nuk e ndiej nevojën për t’u rikthyer. Ndoshta do të trajnoj sërish në të ardhmen, por vetëm kur ta ndiej se më mungon futbolli”, deklaroi ai.

Me tërheqjen e Guardiolës, vëmendja e drejtuesve të futbollit italian përqendrohet te kandidatët më realistë për drejtimin e “Axurrëve”. Në krye të listës janë Andrea Pirlo dhe Roberto Mancini, me Pirlon që konsiderohet favorit në këto momente.

Ish-mesfushori i Italisë gëzon mbështetjen e drejtorit teknik Paolo Maldini dhe këshilltarit Leonardo, të cilët e vlerësojnë prej vitesh si për cilësitë profesionale, ashtu edhe për ato njerëzore. Nga ana tjetër, presidenti i Federatës, Giovanni Malagò, thuhet se ka preferuar rikthimin e Roberto Mancinit, me të cilin ruan një marrëdhënie të ngushtë.

Aktualisht, Pirlo ndodhet në Letoni me skuadrën e United FC Dubai, ku po zhvillon fazën përgatitore. Megjithatë, një takim, qoftë edhe virtual, mund të mjaftojë për të finalizuar marrëveshjen dhe për ta rikthyer në Coverciano, këtë herë në rolin e trajnerit të kombëtares italiane.

Vendimi përfundimtar pritet shumë shpejt, ndërsa zyrtarizimi i emrit të trajnerit të ri mund të vijë që gjatë fundjavës.