Strakoshën e aktivizojnë për ta bërë hero, por në fund shkruan historinë portieri tjetër shqiptar

Superkupa e Greqisë në futboll ka parë dy lojtarë të Kombëtares shqiptare në fushën e lojës, por ai që ka festuar në fund, ka qenë një lojtar i cili pret ende ftesën e kuqezinjve. AEK i Athinës luajti sot përballë OFI të Kretës në ndeshjen dramatike që u vendos nga penalltitë. 

Sfida nisi vetëm me Pilon në fushë në radhët e AEK, që kaloi i pari në avantazh, por më pas u përmbys nga OFI. Dukej gjithçka e mbaruar, por në minutën e fundit shtesë, AEK gjeti barazimin për rezultatin 2-2.

Në atë moment, trajneri i AEK hodhi në fushë Strakoshën, meqë sfida do të kalonte direkt te penalltitë, pasi rregullorja nuk parashikonte kohët shtesë, duke shpresuar që gardiani kuqezi të bënte heroin.

Por për fat të keq, Strakosha nuk arriti të bëhej protagonist duke ndalur ndonjë penallti dhe në fund ishte OFI që fitoi me shifrat 5-4.

Kështu, skuadra e OFI-t shkroi historinë me fitoren e Superkupës, ndërsa mes lojtarëve që morën medalje ishte edhe portieri Klidman Lilo, i cili ishte në stolin e rezervave në këtë duel.