Testi i radhës, Luftëtari dhe Bylisi do të përballen sot në Gjirokastër

Luftëtari dhe Bylis do të përballen sot në një ndeshje miqësore që do të zhvillohet në stadiumin “Gjirokastra” duke nisur në orën 17:00. 

Kjo sfidë do të jetë një tjetër test i rëndësishëm për të dyja skuadrat në prag të sezonit të ri, që i gjen në nivele të ndryshme. Luftëtari do të ketë mundësinë të luaj përpara tifozëve të tij dhe të provojë gjendjen e ekipit në prag të sezonit të ri, ku janë rikthyer sërish në Grupin B të Kategorisë së Dytë dhe kërkohet ngjitja direkt në të Parën.

Ndërsa Bylis, i rënë nga Superiorja, do të kërkoj të shfrytëzojë këtë takim për të parë formën e futbollistëve, kryesisht të rinjtë, dhe harmonizimin e grupit në prag të premirës së Kategorisë së Parë, ku ballshiotët e nisin në shtëpi ndaj Sopotit.

Për skuadrën gjirokastrite kjo miqësore vjen në një moment të rëndësishëm të përgatitjeve. Përballë Bylis Luftëtari do të ketë mundësinë të mase nivelin e tij dhe të nxjerre konkluzionet e nevojshme përpara startit të kampionatit. Të dyja skuadrat pritet tu japin minuta futbollistëve të ndryshëm duke provuar alternativa dhe skema të ndryshme. Përtej rezultatit objektivi kryesor do të jetë përmirësimi i lojës dhe krijimi i një grupi sa më të konsoliduar.

Ndeshja e nesërme në Gjirokastër pritet të jetë një tjetër provë interesante për Luftëtarin dhe Bylisin ndërsa tifozët vendas do të kenë mundësinë të shohin nga afër skuadrën e tyre në këtë fazë përgatitore. Bylisi e nis  sezonin e ri në Kategorinë e Parë nën drejtimin e trajnerit Arlind Rustemi, ndërsa te gjirokastritët është rikonfirmuar Neritan Novi, i cili mori drejtimin e gjirokastritëve pak javë nga fundi i sezonit të shkuar.