Ditën e shtunë vendi ynë pritet të ndikohet nga kushte atmosferike të qëndrueshme, pasi moti do të karakterizohet nga kthje...
SPORT
Teuta mbretëron në Shkodër, Vllaznia zhytet edhe më shumë në krizë
PiranjatPërditësimi i fundit 18 Shtator 2026, 21:58
Durrsakët triumfuan në transfertën e vështirë ndaj shkodranëve, duke konfirmuar momentin e mirë që po kalojnë në këtë fillim sezoni.
Në “Loro Boriçi”, Teuta e Edlir Tetovës e nisi ndeshjen me qetësinë e një skuadre që vinte në krye të renditjes, ndërsa Vllaznia kishte mbi supe presionin për të marrë fitoren e parë të sezonit. Pas katër javësh, shkodranët kishin grumbulluar vetëm 2 pikë, ndërsa durrsakët kishin marrë 10 pikë, me tre fitore dhe një barazim.
Teuta arriti të zhbllokojë sfidën në fundin e pjesës së parë. Në minutën e 45-të+2, Boçi u shfaq mirë në krahun e majtë dhe pasoi në qendër, ku Umeijiego devijoi topin dhe e dërgoi në rrjetë, duke i dhënë avantazhin skuadrës durrsake.
Vllaznia u përpoq të reagonte, por përballë kishte një Teutë të organizuar dhe të sigurt në lojën e saj. Durrsakët menaxhuan avantazhin dhe vazhduan të mbajnë nën kontroll një ndeshje që për ta kishte vlerë të dyfishtë: tri pikë në transfertë dhe konfirmim i formës së shkëlqyer me të cilën kanë nisur sezonin.
Për Vllazninë, situata bëhet gjithnjë e më shqetësuese. Pas pesë javësh, shkodranët ende nuk kanë gjetur fitoren e parë në kampionat, ndërsa Teuta vazhdon të jetë një prej skuadrave që kanë dhënë sinjalet më të forta në startin e këtij edicioni.
