Gjykata e Fierit ka ndryshuar masat e sigurisë për tre vajzat e përfshira në ngjarjen e dhunimit të një 17-vjeçareje, ras...
SPORT
Tifozët marokenë ‘djegin’ Londrën pas eleminimi, përplasen dhunshëm me policinë
PiranjatPërditësimi i fundit 10 Korrik 2026, 12:35
Dalja e Marokut nga Kupa e Botës 2026 u shoqërua me incidente në Londër, ku mbrëmjen e së enjtes u regjistruan përplasje të dhunshme mes tifozëve dhe forcave të policisë në disa zona të qytetit.
Kombëtarja franceze siguroi një vend në gjysmëfinale pasi mposhti Marokun me rezultatin 2-0 në çerekfinale. Golat e Kylian Mbappé dhe Ousmane Dembélé i dhanë fund ëndrrës së marokenëve për të vazhduar rrugëtimin historik në Botëror.
Përpara ndeshjes, vëmendja ishte përqendruar te Parisi, ku autoritetet kishin frikë nga trazira të mundshme, duke pasur parasysh skenat e dhunshme që pasuan festimet e tifozëve të Paris Saint-Germain pas triumfit në Champions League gjatë muajit maj. Megjithatë, situata më problematike u shfaq në kryeqytetin britanik.
Pamjet e publikuara nga zona e Edgware Road treguan turma të mëdha njerëzish të përfshira në përplasje me policinë. Në rrugë u panë tym, mbetje dhe objekte të shpërndara, ndërsa efektivët, të pajisur me mburoja dhe jelekë mbrojtës, ndërhynë për të rikthyer kontrollin.
Sipas pamjeve që qarkulluan në rrjetet sociale, disa persona hodhën fishekzjarre dhe sende të forta në drejtim të policisë. Një video tregonte gjithashtu një efektiv të shtrirë në tokë, megjithëse nuk ka ende informacion zyrtar mbi gjendjen e tij apo mënyrën se si u lëndua.
Gjatë incidenteve, disa tifozë valëvitën flamujt e Marokut në mes të rrugës, duke bllokuar qarkullimin, ndërsa të tjerë u ngjitën mbi automjete që përpiqeshin të kalonin në zonë.
Ndryshe nga Londra, atmosfera në Paris mbeti kryesisht festive. Mbështetës të Francës dhe Marokut dolën së bashku në rrugë, duke festuar pa incidente të mëdha. Në shumë lagje të qytetit, automjetet qarkullonin me flamujt e të dy vendeve dhe tifozët festonin në harmoni.
Në aspektin sportiv, suksesi i Francës u vulos nga golat e Mbappé dhe Dembélé. Sulmuesi i Real Madridit shënoi golin e tij të tetë në këtë Kupë Bote, duke barazuar rekordin e Lionel Messit për numrin më të madh të golave në një edicion të turneut.
Me këtë fitore, Franca arrin për herë të tretë radhazi në gjysmëfinalet e Kupës së Botës. Nga ana tjetër, edhe pse u eliminua, Maroku mbyll një tjetër turne historik, duke u bërë kombëtarja e parë afrikane që arrin më shumë se një herë në fazën e çerekfinaleve të Botërorit.
