16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
SPORT
“Topi i Artë”/ Elena Sadiku mes 5 kandidateve, jashtë listës Hansi Flick dhe Lionel Scaloni
PiranjatPërditësimi i fundit 8 September 2026, 15:42
Elena Sadiku shkruan historinë në “Topin e Artë”. Trajnerja me origjinë nga Kosova është përfshirë mes pesë kandidateve për çmimin e trajneres së vitit në futbollin e femrave, duke u bërë shqiptarja e parë që hyn në këtë garë.
32-vjeçarja është pjesë e listës së publikuar për ceremoninë e “Topit të Artë”, e cila do të mbahet më 26 tetor në Angli. Sadiku, e lindur në Gjermani dhe me prejardhje nga Kosova, aktualisht drejton klubin suedez Hacken.
Në garë për çmimin ajo është përballë Jonatan Giráldez të Lyonit, Andrée Jeglertz të Manchester Cityt, Nils Nielsen të Japonisë dhe Pere Romeut të Barcelonës. Sadiku është e vetmja trajnere femër në këtë listë prej pesë kandidatësh.
Nominimi vjen pas një periudhe të suksesshme në karrierën e saj. Me Celticun, Sadiku fitoi kampionatin skocez në vitin 2024, ndërsa sezonin e kaluar, me Hackenin, fitoi trofeun evropian Europa Cup për femra.
Në të njëjtën ceremoni janë shpallur edhe pesë kandidatët për trajnerin e vitit në futbollin e meshkujve. Në listë janë Mikel Arteta, Luis Enrique, Luis de la Fuente, Unai Emery dhe Vincent Kompany. Emra si Hansi Flick dhe Lionel Scaloni nuk janë pjesë e pesëshes.
Kandidatura e Sadikut përbën një moment të veçantë për futbollin shqiptar dhe kosovar, pasi ajo është e para me origjinë shqiptare që përfshihet në garën për këtë vlerësim si trajnere.
