U shpall kampion Europe nën urdhrat e Murinjos, zhduket ish-futbollisti i njohur. Policia nis kërkimet

Ish-futbollisti i Kombëtares së Hungarisë, Akos Buzhaski, është shpallur i zhdukur dhe autoritetet hungareze kanë nisur kërkimet për të.

44-vjeçari, i cili gjatë karrierës së tij regjistroi 20 paraqitje me fanellën e Hungarisë, është i njohur edhe për periudhën e tij te Porto. Në vitin 2003, nën drejtimin e Zhoze Murinjos, Buzhaski ishte pjesë e skuadrës që fitoi kampionatin portugez, Kupën e Portugalisë dhe Kupën UEFA.

Mesfushori nuk arriti të kishte një rol të rëndësishëm në sezonin pasardhës, kur Porto triumfoi në Ligën e Kampionëve. Më pas, ai vijoi karrierën në Angli, ku luajti për Plimuthin, QPR, Portsmuthin dhe Barnslin. Në vitin 2015, Buzhaski i dha fund karrierës si futbollist pas një periudhe te Ferencvarosh.

Pas tërheqjes nga futbolli, ish-mesfushori provoi të angazhohej si trajner dhe drejtor teknik, por pa arritur suksesin e pritshëm. Në intervista të dhëna për mediat hungareze, ai kishte folur hapur edhe për vështirësitë e periudhës pas futbollit profesionist, përfshirë problemet me varësinë, të cilat sipas tij nisën pas humbjes së motivimit sportiv.

Ndërkohë, policia hungareze e ka përfshirë emrin e Buzhaskit në listën e personave të kërkuar. Deri tani, autoritetet nuk kanë bërë të ditura rrethanat e zhdukjes së tij.

Kërkimet për ish-futbollistin 44-vjeçar vijojnë, ndërsa pritet që policia të japë më shumë detaje në lidhje me rastin.