Vazhdon përplasja e madhe, FIFA i përgjigjet UEFA-s për planin për privatizim Kupës së Botës

FIFA ka mbrojtur planin e saj për privatizimin e pjesshëm të operacioneve komerciale të Kupës së Botës, duke theksuar se propozimi nuk nënkupton “shitjen e futbollit”, pavarësisht kundërshtimeve të forta nga UEFA dhe konfederata të tjera kontinentale. Organizata ka fajësuar “raportimin e pasaktë në media” për keqkuptimet rreth projektit dhe ka publikuar detaje shtesë për propozimin, raporton KosovaPress.

Sipas planit, FIFA synon të krijojë një degë të re të quajtur FIFA Forëard Enterprise (FFE), e cila do të menaxhojë aktivitetet komerciale dhe operative të turneve të saj, përfshirë të drejtat televizive, sponsorizimet, licencimin dhe shitjen e biletave. FIFA do të mbajë kontrollin mbi këtë strukturë, ndërsa do të shesë një pjesë jo-kontrolluese të aksioneve investitorëve privatë për të siguruar financim shtesë.

Presidenti i FIFA-s, Gianni Infantino, pret që iniciativa të gjenerojë deri në 20 miliardë dollarë, ndërsa ka propozuar që secila nga 211 federatat anëtare të përfitojë nga 20 milionë dollarë për periudhën 2027-2030. Megjithatë, UEFA ka votuar unanimisht për bojkotimin e Kupave të Botës të FIFA-s nëse projekti vazhdon në formën aktuale, ndërsa CONCACAF e ka refuzuar dhe Konfederata Aziatike e Futbollit e ka cilësuar atë “krejtësisht të papranueshëm”.

Në reagimin e saj zyrtar, FIFA theksoi se “askush nuk po shet futboll” dhe se FFE është propozuar vetëm për të rritur të ardhurat në dobi të të gjitha federatave anëtare, pa ndryshuar strukturën qeverisëse të organizatës. Sipas FIFA-s, çdo federatë duhet të ketë të drejtën të shqyrtojë dhe të vendosë në mënyrë demokratike për këtë propozim.

Organizata sqaroi gjithashtu se, nëse shumica e federatave nuk e mbështesin projektin, aktivitetet komerciale të FIFA-s do të mbeten të pandryshuara dhe FFE nuk do të krijohet. Federatat anëtare kanë afat deri më 19 shtator për të vendosur mbi propozimin, ndërsa Infantino ka paralajmëruar se mosmiratimi i tij do të nënkuptojë humbjen e mundësisë për financim shtesë prej 40 milionë dollarësh për secilën federatë.