Xavi pranë rikthimit në stol/ Al-Ahli e vendos në krye të listës për trajnerin e ri

Xavi Hernandez mund të rikthehet së shpejti në stol, pasi trajneri spanjoll është një nga kandidatët kryesorë për të marrë drejtimin e Al-Ahlit në Arabinë Saudite.

Klubi nga Jeddah po kërkon pasuesin e Matthias Jaissle, i cili u largua pas tre sezonesh në krye të skuadrës. Drejtori sportiv Rui Pedro ka nisur kontaktet me disa kandidatë, ndërsa Xavi shihet si një nga alternativat kryesore, së bashku me Vitor Pereira dhe Nuno Espirito Santo.

Fakti që Xavi është pa kontratë që prej largimit nga Barcelona në maj të vitit 2024 e favorizon në negociata, pasi Al-Ahli nuk do të duhet të paguajë kompensim për një klub tjetër.

Për Xavin, një kalim në Arabinë Saudite do të ishte rikthim në futbollin e Lindjes së Mesme. Para aventurës te Barcelona, ai drejtoi Al-Sadd në Katar, ku fitoi shtatë trofe.

Al-Ahli ka një skuadër të mbushur me emra të njohur të futbollit evropian, mes tyre Riyad Mahrez dhe Ivan Toney. Trajneri i ri do të ketë detyrën të ruajë nivelin e skuadrës dhe ta mbajë atë në garë për trofetë vendas e kontinentalë.

Klubi saudit pritet të vijojë negociatat me kandidatët në ditët në vijim, ndërsa Xavi mbetet një nga favoritët për të marrë drejtimin e skuadrës.