Yamal ende pa gol në startin e sezonit, por Barcelona nuk shqetësohet/ 19-vjeçari “shpërthen” ndaj Athletic Bilbaos

Barcelona nuk është e shqetësuar nga fakti që Lamine Yamal ende nuk ka shënuar në ndeshjet e para të sezonit 2026/27. Brenda klubit besohet se 19-vjeçari po tregon shenja të rikthimit në formën e tij më të mirë.

Trajneri Hansi Flick ka pranuar se Yamal nuk është ende në nivelin e tij maksimal, por në Barcelonë ka besim se paraqitjet e tij do të përmirësohen gjatë sezonit.

Pas një ndeshjeje më të qetë në startin e kampionatit ndaj Elçes, Yamal ishte më aktiv në sfidën kundër Athletic Bilbaos. Ai luajti 90 minuta në krahun e djathtë dhe krijoi vazhdimisht probleme për mbrojtjen kundërshtare me shpejtësinë, driblimet dhe aksionet e tij.

Edhe pse nuk arriti të shënonte, statistikat e tij tregojnë një tjetër paraqitje. Yamal regjistroi 7 gjuajtje, 3 prej tyre në portë, 5 raste të krijuara dhe 3 driblime të suksesshme. Ai kompletoi 45 pasime dhe u përfshi në 85 aksione gjatë ndeshjes.

Portieri i Athletic Bilbaos, Unai Simon, i cili u shpall lojtari i ndeshjes, pati një rol të rëndësishëm në pengimin e Yamalit.

Dy pritje të tij në pjesën e parë i mohuan anësorit të Barcelonës golin, ndërsa në pjesën e dytë një tjetër tentativë e Yamalit përfundoi në shtyllë.

Kjo paraqitje ka rritur besimin e Barcelonës se forma e 19-vjeçarit është në rrugën e duhur. Mungesa e golave në fillim të sezonit nuk shihet si problem, pasi klubi vlerëson edhe ndikimin e tij në krijimin e rasteve dhe lojën sulmuese.

Barcelona beson se Yamal do të rikthehet gradualisht në nivelin e tij më të mirë dhe paraqitja ndaj Athletic Bilbaos shihet si një shenjë pozitive në këtë drejtim.