Ylli i Real Madridit dënohet për drejtim të makinës në gjendje të dehur

Mbrojtësi i Real Madridit, Raúl Asencio, është dënuar për drejtim të automjetit nën ndikimin e alkoolit në jug të Gran Canarias.

Futbollisti u ndalua më 16 gusht gjatë një kontrolli rutinë, teksa drejtonte një Porsche. Testi i alkoolit tregoi një nivel rreth katër herë më të lartë se kufiri i lejuar.

Asencio e pranoi shkeljen dhe më 19 gusht u dënua në një gjykim të përshpejtuar në San Bartolomé de Tirajana.

Ai u gjobit me 14,400 euro dhe iu pezullua patenta e drejtimit për tetë muaj.

Dënimi u dha për drejtim të mjetit në gjendje të dehur, vepër që sipas ligjit spanjoll konsiderohet penale kur niveli i alkoolit tejkalon kufirin e përcaktuar.