Zyrtare/ Joao Cancelo rikthehet te Barcelona, firmos deri në vitin 2029

Joao Cancelo është zyrtarisht sërish futbollist i Barcelonës. Klubi katalanas ka konfirmuar rikthimin e mbrojtësit portugez, i cili ka firmosur një kontratë që e lidh me “blaugranat” deri në vitin 2029.

Cancelo bashkohet me Barcelonën si lojtar i lirë, pasi ndërpreu marrëdhënien me Al Hilal, ku kishte kontratë deri në vitin 2027. Portugezi ishte transferuar te klubi saudit në vitin 2024, për shumën e 25 milionë eurove, pas eksperiencës së tij të parë në Barcelonë.

Mbrojtësi 32-vjeçar e kishte veshur për herë të parë fanellën e Barcelonës në sezonin 2023/24, kur u transferua në formë huazimi nga Manchester City. Nën drejtimin e Xavit, Cancelo u aktivizua rregullisht dhe la përshtypje pozitive gjatë aventurës së tij të parë në “Camp Nou”.

Pas largimit të tij drejt Arabisë Saudite, Barcelona ka vendosur t'i besojë sërish portugezit, tashmë në një marrëveshje afatgjatë.

Rikthimi i Cancelos pritet t’i japë më shumë alternativa trajnerit në krahët e mbrojtjes, ndërsa portugezi synon të rikthehet në nivelet më të larta në një klub ku tashmë ka luajtur dhe është ambientuar. Kontrata deri në qershor 2029 tregon qartë besimin e Barcelonës te eksperienca dhe cilësitë e tij.