Të shtëna me armë janë raportuar ditën e sotme në Mirditë.
Një person ka mbetur i vrarë, ndërsa nuk dihen r...
AKTUALITET
AKEP propozon tarifat e reja: Të paguhen nga operatorët e komunikimeve elektronike dhe postare
M.B.Përditësimi i fundit 14 Prill 2025, 07:30
TIRANA- Autoriteti i Komunikimeve Elektronike dhe Postare (AKEP) ka përgatitur një dokument që përcakton tarifat e reja që do të paguhen nga operatorët e tregut, për disa shërbime të parashikuara në ligjin e ri “Për komunikimet elektronike”, që u miratua vitin e kaluar. Ligji i ri përmban një sërë përcaktimesh të reja në lidhje me buxhetin dhe financimin e AKEP si dhe parime për tarifat që paguajnë sipërmarrësit për të mbuluar kostot administrative të AKEP për të kryer funksionet e tij rregullatore dhe mbikëqyrëse.
Sipas nenit 26 të ligjit të ri, para fillimit të aktivitetit, çdo sipërmarrës njofton AKEP sipas një formulari të miratuar. Për ushtrimin e të drejtave, që rrjedhin nga autorizimi i përgjithshëm, sipërmarrësi i autorizuar nuk ka nevojë për marrjen e një vendimi apo akti administrativ të posaçëm nga AKEP. Ligji parashikon që AKEP i regjistron operatorët ose ofruesit e shërbimeve në bazën e të dhënave elektronike brenda shtatë ditëve nga marrja e njoftimit dhe njofton regjistrimin e tyre me shkrim. AKEP më tej miraton me rregullore formën dhe përmbajtjen e njoftimit, dokumentacionin mbështetës dhe konfirmimin e regjistrimit.
Sipas propozimeve të AKEP, Certifikata e Konfirmimit të Njoftimit/Regjistrimit do të lëshohet për çdo sipërmarrës, pas njoftimit dhe regjistrimit në Regjistrin e Autorizimit të Përgjithshëm, sipas pikës 5 të Nenit 27 të Ligjit “Për komunikimet Elektronike”. Për shërbimin, AKEP propozon një tarifë prej 50 mijë lekësh. Tarifa do aplikohet vetëm një herë për regjistrimin e parë të sipërmarrësit në regjistrin e ri të Autorizimit të Përgjithshëm.
Ndërsa lëshimi i Certifikatës së Konfirmimit të Ndryshimeve të të dhënave në regjistrin e autorizimit të përgjithshëm propozohet të ketë një tarifë prej 20 mijë lekësh. Certifikata lëshohet në rastet e njoftimit nga sipërmarrësi të ndryshimeve të ndodhura në informacionin e dhënë fillestar ose atë pararendës.
Një shërbim i tretë i propozuar në projektrregullore do të jetë lëshimi i Deklaratës ose Certifikatës së Konfirmimit për lehtësimin e ushtrimit të të drejtave për instalimin e faciliteteve dhe interkoneksion do të ketë gjithashtu një tarifë prej 50 mijë lekësh.
Synojnë të mbulojnë kostot administrative shtesë të AKEP në lidhje me regjistrimin për herë të parë të sipërmarrësve në regjistrin e ri të Autorizimit të Përgjithshëm dhe punën rregullatore për përgatitjen dhe zbatimin e akteve nënligjore. Gjithashtu, AKEP vlerëson se ato janë transparente dhe proporcionale, për të minimizuar kostot administrative shtesë të AKEP për shqyrtimin e cdo njoftimi për herë të parë sipas AP të re si dhe cdo ndryshimi të mëvonshëm në njoftimin nga sipërmarresi përkatës. Sipas AKEP, janë të arsyeshme dhe nuk përbëjnë barrë të rëndë apo të tepërt financiare për sipërmarrësit e rrjeteve ose shërbimeve të komunikimeve elektronike./ Monitor
