Gratë janë ende të nën-përfaqësuara në politikën amerikane, por në zgjedhjet më 3 nëntor, ato mund t&eum...
BOTA
Shifra rekord për ‘kokën’ e ‘bosit’ të kokainës më të kërkuar të Evropës, trafikoi 7 ton drogë
PiranjatPërditësimi i fundit 2 November 2026, 22:37
Autoritetet holandeze kanë ofruar një shpërblim rekord prej 2 milionë eurosh për çdo informacion që do të çojë në arrestimin e Jos Leijdekkers, një prej trafikantëve më të kërkuar të drogës në Europë. 35-vjeçari, i njohur edhe me nofkën “Bolle Jos” (Josi i shëndoshë), është cilësuar më parë nga policia holandeze si “një nga figurat kryesore të trafikut ndërkombëtar të kokainës”.
Duke komentuar vendimin për rritjen dhjetëfish të shpërblimit, ministri holandez i Drejtësisë, David van Weel, deklaroi se kjo ishte “e domosdoshme, duke pasur parasysh kërcënimin që Leijdekkers përbën për sigurinë kombëtare, shtetin tonë demokratik të së drejtës dhe rendin juridik ndërkombëtar”.
Sipas prokurorëve holandezë, arrestimi i tij është “prioriteti më i lartë”, ndërsa çdo informacion i dhënë nga qytetarët do të trajtohet në mënyrë konfidenciale.
Dyshohet se fshihet në Sierra Leone me identitet të rremë
Jos Leijdekkers është përfshirë në listën e Europolit si një nga personat më të kërkuar në arrati. Sipas BBC-së, në janar të vitit 2025, policia holandeze bëri të ditur se dyshohet që ai jeton në Sierra Leone dhe përdor një identitet tjetër, me emrin Omar Sherrif.
Madje, janë publikuar edhe fotografi ku ai shfaqet pranë presidentit të vendit, Julius Maada Bio, si dhe zyrtarëve të tjerë.
Prokurorët holandezë kanë kërkuar ekstradimin e tij, por Sierra Leone ka refuzuar të bashkëpunojë. Kjo ka bërë që Bashkimi Europian të ndërpresë një pjesë të ndihmës për këtë shtet.
Afrika Perëndimore konsiderohet një pikë e rëndësishme tranziti për trafikun e kokainës nga Amerika Latine drejt tregjeve të tjera.
I dënuar me 24 vite burg për trafikimin e mbi 7 tonëve kokainë
Në vitin 2024, një gjykatë në Roterdam e dënoi Leijdekkers në mungesë me 24 vite burg, pasi e shpalli fajtor për trafikimin kontrabandë të më shumë se shtatë tonëve kokainë. Ai është dënuar gjithashtu me 79 vite burg në Belgjikë.
Autoritetet holandeze vlerësojnë se Leijdekkers ka përfituar dhjetëra miliona euro nga trafiku i paligjshëm i kokainës. Ai akuzohet gjithashtu për pastrim parash dhe përfshirje në akte dhune ekstreme. /PiranjatNews/
