Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
AKTUALITET
Aksidentet në punë po rriten, 194 persona kanë humbur jetën nga 2018-2023
r.llPërditësimi i fundit 27 Janar 2025, 12:01
foto ilustruese
TIRANË- Numri i viktimave nga aksidentet në punë është rritur ndjeshëm vitet e fundit sipas një studimi të Institutit të Shëndetit Publik (ISHP). Sipas të dhënave nga 2018 në vitin 2023 kanë humbur jetën nga aksidentet në punë 194 persona. Instituti i Shëndetit publik vë në dukje se Shqipëria ende përballet me sfida serioze, ndërsa në BE 1 në 1000 aksidente në punë është fatale (2019), në Shqipëri 1 në 6 aksidente çon në humbjen e jetës së një punëtori.
Numri i aksidenteve me vdekje në punë është rritur gjatë viteve të fundit. Numri i viktimave në punë është rritur nga 19 në 2013 në 38 në 2019, vëren studimi i iSHP-së. Më tej, numri i vdekjeve të raportuara sipas inspektoriatit Shtetëror të Punës dhe Shërbimeve Sociale (IShPShSh), qëndron në vlerat 32 për vitin 2022 dhe 30 për vitin 2023. Sipas inspektoratit, gjatë vitit 2023 janë regjistruar gjithsej 218 raste aksidentesh në punë, të cilat pas verifikimit apo hetimit 84.8 % kanë rezultuar aksidente në punë.
Në 2023 janë klasifikuar dhe vërtetuar si aksident në punë 168 punëmarrës, nga të cilët 30 me pasojë humbjen e jetës.
Sektorët më të rrezikuar për aksidentet në punë janë ai minerar, elektriciteti, ndërtimi, ndërmarrjet prodhuese dhe aksidentet rrugore. Këto të fundit klasifikohen si aksidente në punë, për shkak se kanë elementet ligjore të klasifikimit të aksidentit, p.sh.: punëmarrësi ka qenë në përmbushje të detyrës sipas përshkrimit të punës së tij, me urdhër të punëdhënësit apo në linjën e drejtpërdrejtë të rrugës që përshkon nga shtëpia për në punë dhe anasjelltas.
Aksidentet në vendin e punës kanë qenë ndër vite në fokus të Shëndetit Publik dhe kryesisht sektorët e ndërtimit dhe ai minerar raportohen si më problematik. Ekspertët pohojnë se rol të rëndësishëm në parandalimin e aksidenteve në punë luan forcimi i bashkëpunimit nëpërmjet të gjitha institucioneve dhe autoriteteve kompetente sipas specifikave përkatëse në trajtimin dhe hetimin e çdo ngjarje apo aksidenti të ndodhur.
Sistemi i mbrojtjes i cili rrjedh nga legjislacioni ynë i punës përfshin normat juridike, të cilat rregullojnë të drejtat dhe obligimet në aspektin e kufizimit të kohës së punës, pushimit, mbrojtjes së të rinjve dhe grave, etj. Por ekspertët e shëndetit publik sugjerojnë identifikimin e sektorëve dhe profesioneve të rrezikshme të cilat kërkojnë prioritizimin dhe formulimin efektiv të legjislacionit me politika dhe programe të posaçëm.
Sipas vlerësimeve të Organizatës Ndërkombëtare të Punës ose International Labor Organization (ILO), pothuajse tre milionë punëtorë vdesin çdo vit në të gjithë botën për shkak të aksidenteve dhe sëmundjeve të lidhura me punën, një rritje prej më shumë se 5% krahasuar me vitin 2015./MONITOR
