Një aksident me tre automjete është regjistruar në Lushnjë, në rrugën që të çon drejt stadiumit, pranë...
AKTUALITET
"Albanês, Forbes dhe Globe!"/ U kap në Dubai, kush është Armando Pacani, u kamuflua si biznesmen. Jeta e re me gruan gjermane...larg Brazilit!
r.llPërditësimi i fundit 10 Gusht 2024, 10:28
foto ilustruese
TIRANË- Detaje të tjera janë mësuar lidhur me arrestimin e 40-vjeçarit Armando Pacanit në Dubai. Mediat braziliane kanë zbuluar me shumë detaje lidhur me jetën e tij dhe aktivitetin kriminal të shqiptarit, i cili deri vetëm pak ditë më parë ishte një ‘fantazmë’ për autoritetet shqiptare dhe ato të huaja. Organizata Ndërkombëtare e Policisë Kriminale (Interpol) e arrestoi Pacanin në Dubai, pasi po hetohej në Brazil për drejtimin e një grupi kriminal që dërgonte kokainë në Europë.
Kapja u bë më 29 korrik, e kryer nga policia e Dubait, por u raportua vetëm pak ditë më pas nga Interpoli. Në Dubai, shqiptari jetonte si CEO i një kompanie metalesh, duke ndërtuar fasadën e një biznesmeni, kur në fakt negocionte tonelata droge. Pacani është i martuar me një grua gjermane dhe prej kohësh jetonte në Brazil. Nga hetimet vlerësohet të ketë nxjerrë në treg 17 ton ‘mall’ me vlerë 3.8 miliardë dollarë, duke u kthyer në një nga shitësit më të mëdhenj të kokainës në Europë.
Grupi i tij dërgoi të paktën 13 ngarkesa kokaine nga vendet e Andeve, nga portet e Rio Grande, në Rio Grande do Sul dhe Itajaí, në Santa Catarina. Droga fshihej në kontejnerë me ngarkesë të ligjshme, pa dijeninë e pronarëve të mallit, ose lihej në anije peshkimi. Një nga dërgesat u sekuestrua nga marina franceze pranë Sierra Leones në nëntor 2022. Varka e peshkimit mbante 4.6 ton kokainë në rreth 100 valixhe.
Për të gjitha mendonte Pacani! Që nga blerja e drohës, tek magazinimi, dërgimi në port...madje kujdesej se kush e merrte "mallin" në Europë. Por, aksioni iu ndërpre kur u fut në listën e të kërkuarve gjatë operacionit "Hinterland" që u zhvillua në mars të vitit të kaluar. Pacani, përveç emerit të tij, ishte i njohur në aplikacionin "SkyECC"edhe me nofkat Albanês (Shqiptari), Forbes dhe Globe.
Për të fshehur sasitë e mëdha të gjeneruara nga trafikimi ndërkombëtar, organizata kriminale përdori metoda të ndryshme të fshehjes së kapitalit. Grupi kishte një lloj banke paralele për të dërguar para jashtë vendit për të paguar furnitorët dhe rrjete të personave juridikë të parë për të qarkulluar fluksin financiar.
Në një deklaratë për të mbrojtur shqiptarin kanë dalë edhe avokatët e tij Eduardo Maurício dhe Diego Pereira Barrios deklarojnë, sipas të cilëve Pacani "është i pafajshëm"
"Ai është i persekutuar nga sistemi i drejtësisë braziliane sepse është shtetas i huaj. Kjo është vërtet absurde dhe një fyerje për drejtësinë,”-thanë ata.
Në mars të vitit të shkaur autoritetet evropiane dhe braziliane ranë në gjurmët e një organizate që trafikonte drogë të llojit kokainë me shtrirje nga Brazili deri në Dubai. Pas dy vite hetimesh u zbulua se organizata kriminale ka trafikuar 17 tonë drogë në Evropë, 12 nga të cilat janë sekuestruar. Asokohe "la Repubblica" e krahasonte rrjetin e shqiptarëve me ndranghetën, teksa shkruan se kanë karakteristika të njëjta.
“Nga një rrjet i vogël që vepronte në nivel lokal, tani e ka zgjeruar sferën e saj të ndikimit në vetë Amerikën Latine. Ata janë të organizuar, kanë para dhe një hierarki të ngurtë të bazuar në lidhjet familjare. Kanë të njëjtat karakteristika të 'ndranghetës, e cila mbetet mafia më e fortë ndërkombëtare. Grupin e drejtonte Armando Pacani, është i lidhur me një klan ballkanik. Gjurma e fundit e tij shfaqet në regjistrin e hyrjeve në Brazil në janar 2019. Njëzet muaj më vonë ai ishte nisur tashmë me një fluturim që e çoi nga Sao Paulo në Dubai. U zhduk. Që nga ajo ditë ai u bë një fantazmë,”- shkruanyr media italiane.
Si nisën hetimet
Hetimi që solli operacionin “Hinterland” filloi në mars 2021, pas një sekuestrimi prej 316 kilogramësh kokainë që ndodhi në Hamburg të Gjermanisë. Pas konfiskimit të drogës, u identifikua një furnizues me kombësi paraguajane, i cili po merrte kokainën e prodhuar në Bolivi dhe vende të tjera dhe po hynte në Brazil përmes Ponta Porã. Droga më pas transportohej me kamionë në Santa Catarina dhe Río Grande do Sul, ku ngarkesat ruheshin në kompanitë e organizatës kriminale pranë porteve të Río Grande dhe Itajaí. Nga atje ngarkesat u kontaminuan në dërgesa të ligjshme në bashkëpunim me menaxherët e logjistikës për t’u dërguar në kontinentin evropian. Ndërkohë në Europë, ishte përgjegjës për shpërndarjen në vende të ndryshme të rajonit shqiptari Pacani./ZËRI
