Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
AKTUALITET
“Askush nuk mund të rritet nëse nuk e pranon vogëlsinë e tij/saj!" Ndërroi jetë sot, ja disa nga thëniet e Papa Françeskut
M.B.Përditësimi i fundit 21 Prill 2025, 19:05
VATIKAN- Papa Françesku ka ndërruar jetë ditën e sotme në moshën 88-vjeçare. Papa, i cili ishte peshkop i Romës dhe kreu i Kishës Katolike, u bë Papë në vitin 2013 pasi paraardhësi i tij Benedikti XVI dha dorëheqjen. Vdekja e tij u njoftua nga kardinali Kevin Farrell në një deklaratë të lëshuar nga Vatikani. Vatikani njoftoi se Ati i Shenjtë ka ndërruar jetë mëngjesin e ditës së sotme.
Në deklaratën që u lexua nga kardinali Kevin Farrell thuhet se e gjithë jeta e Papës iu kushtua shërbimit të Zotit dhe Kishës së Tij. Më tej thuhet se Papa i mësoi të jetojnë vlerat e Ungjillit me besnikëri, guxim dhe dashuri universale, veçanërisht në favor të më të varfërve dhe më të margjinalizuarve.
Ati i Shenjtë ishte i pari papë nga Amerika e Jugut dhe njëkohësisht i pari papë Jezuit. Kohët e fundit shëndeti i tij u përkeqësua shumë si pasojë e pneumonisë, sëmundje që shënjoi jetën e tij që në moshën 21-vjecare, ku si pasojë e pneumonisë, ai iu nënshtrua një ndërhyrjeje kirurgjikale, ku ju hoq pjesa e sipërme e mushkërisë së djathtë. Më poshtë janë të renditura disa nga thëniet e Atit të Shenjtë gjatë papatit të tij:
Disa thënie nga Papa Françesku:
“Askush nuk mund të rritet nëse nuk e pranon vogëlsinë e tij/saj”.
“Ki guximin të jesh plotësisht i/e lumtur”.
“Ne të gjithë kemi një Zot që është i aftë të qajë me ne dhe që është i aftë të ecë me ne edhe në momentet më të vështira të jetës”.
“Bota na thotë të kërkojmë sukses, fuqi dhe para. Zoti na thotë të kërkojmë përulësi, dashuri dhe t’u shërbejmë të tjerëve”.
“Le të mësojmë të jetojmë me mirësi, ta duam këdo, edhe kur të tjerët nuk na duan po njësoj”.
“Paqja është një dhuratë e çmuar, e cila duhet promovuar dhe mbrojtur. Asnjëherë dhuna nuk ka lindur prej paqes. Lufta prodhon luftë, paqja prodhon paqe”.
“Të kesh besim nuk do të thotë të mos kesh vështirësi, por të kesh fuqinë e duhur për t’i përballur këto vështirësi, duke ditur se nuk jemi të vetëm”.
“Për ta ndryshuar botën, duhet të sillemi mirë edhe me ata që nuk na e kthejnë mbrapsht mirësinë”.
“Zoti nuk lodhet duke na falur, jemi ne që lodhemi duke mos u lutur për faljen e Tij”.
“Shpresa hap orizonte të reja, duke na bërë të aftë të ëndërrojmë edhe atë që është e paimagjinueshme”.
