Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
AKTUALITET
Banka e Shqipërisë ka blerë të paktën 31.6 milionë euro që nga fillimi i vjeshtës
n.fPërditësimi i fundit 22 Tetor 2024, 08:17
Foto ilustruese
TIRANË- Banka e Shqipërisë ka vijuar edhe gjatë vjeshtës programin e blerjeve në tregun valutor. Sipas të dhënave nga tregu, në dy ankandet e fundit, të muajve shtator dhe tetor, banka qendrore ka blerë gjithsej 31.6 milionë euro.
Në ankandin e ditës së premte, shuma e planifikuar për t’u blerë në raundin e parë të ankandit ishte mes pesë dhe dhjetë milionë eurove, ndërsa Banka e Shqipërisë realizoi blerje në vlerën e sipërme të intervalit, për gjithsej 10 milionë euro.
Banka e Shqipërisë ushtroi edhe opsionin e blerjes në raundin e dytë, për një shumë shtesë prej 5.2 milionë eurosh, me kursin mesatar të blerjeve në raundin e parë, prej 5.2 milionë eurosh. Në total, shuma e blerë në ankandin e datës 18 tetor arriti në 15.2 milionë euro.
Edhe kë ankandin e muajit shtator, Banka e Shqipërisë në raundin e parë realizoi blerje në vlerën e sipërme të intervalit, me 10 milionë euro, ndërsa më tej ushtroi të drejtën e blerjes edhe në raundin e dytë, me 6.4 milionë euro të tjera. Në total, shuma e blerë arriti vlerën e 16.4 milionë eurove, me një kurs mesatar të ponderuar prej 99.34 lekësh.
Përveç blerjeve në ankande, për gjithsej 31.6 milionë euro, që nga fillimi i muajit tetor Banka e Shqipërisë ka rifilluar edhe blerjet direkte të euros në tregun valutor, me qëllim për të mos lejuar forcimin e mëtejshëm të lekut në kursin e këmbimit. Vlerat e blera në operacionet direkte nuk bëhen publike nga Banka e Shqipërisë deri në fundin e tremujorit pasardhës.
Sidoqoftë, kursi i euros vazhdon të qëndrojë pranë vlerave minimale historike. Sipas kursit zyrtar të Bankës së Shqipërisë, euro këmbehej të hënën me 98.73 lekë, me rritje prej vetëm 0.01 lekë në raport me fundin e javës së kaluar.
Banka e Shqipërisë nisi ndërhyrjet direkte në tregun valutor në muajin maj dhe arriti ta mbante kursin e këmbimit euro-lek sipër nivelit të 100 lekëve deri në fillim të gushtit.
Vetëm në gjysmën e parë të këtij viti, Banka e Shqipërisë ka blerë gati 272 milionë euro në tregun valutor, nga të cilat 134.2 milionë euro në ankandet e planifikuara për nevojat e rezervës valutore, ndërsa edhe më shumë, 137.6 milionë euro, janë blerë me operacione të drejtpërdrejta, me qëllim për të shmangur forcimin e mëtejshëm të lekut në kursin e këmbimit valutor.
Pasi Banka e Shqipërisë ndërpreu blerjet direkte, kursi i euros ra gradualisht poshtë nivelit të 100 lekëve. Por, në muajin tetor, Banka e Shqipërisë ka konstatuar një forcim të presioneve rënëse mbi kursin e euros dhe ka ndërhyrë përsëri në treg.
Gjatë gjithë vitit 2024, Banka e Shqipërisë synon të blejë përmes ankandeve shumën prej 250-330 milionë eurosh për rritjen e rezervës valutore. Megjithatë, duke përfshirë edhe blerjet direkte të valutës, vlerësohet se tashmë shuma e blerë gjatë këtij viti ta ketë kaluar ndjeshëm intervalin e sipërm të objektivit, prej 330 milionë eurosh.
Në mungesë të këtyre blerjeve, rënia e kursit të këmbimit të euros me lekun do të kishte qenë edhe më e madhe./Monitor
