Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Banorët e Velipojës vijojnë protestat kundër ndërtimit të resortit: Po vjedhin tokat tona! Duam drejtësi!
Nga Xhuljan FerzajPërditësimi i fundit 9 Shkurt 2026, 09:50
Mëngjesin e sotëm, banorët e Baks-Rrjollit në Velipojë dolën sërish në protestë për të kundërshtuar projektin për ndërtimin e resortit turistik në tokat e tyre.
Tre ditë më parë, banorët ndaluan punonjësit e kompanisë të vijonin punimet, kundërshtim i cili u shoqërua me përplasje fizike, disa prej protestuesve u shoqëruan në polici. Banorët deklaruan se janë pronarë legjitim të tokave, dhe se nuk do të lejojnë që projekti të realizohet, protestat do të vijojnë pa afat. Ndërkohë ekspertët e mjedisit e kanë konsideruar projektin si krim mjedisor, sipas tyre nuk duhet të jepej leja për ndërtimin e projektit.
Banorët e fshatit kërkuan takim me biznesmenin investitorin Bashkim Ulaj, ndërsa kërkesa e tyre është pezullimi i punimeve deri në gjetjen e një dakordësie.
“Katër breza, babë, gjysh, katragjysh, që jemi, na i solli këtu. Me thënë urdhra, zotëri, këtu më ka lënë gjyshi, këtu më ka lënë baba, këtu kam blerë vetë, këtu kam pasur stërnipat. I bëjmë thirrje edhe njëherë shtetit shqiptar, me një pikë pështymë, të nxjerrë ekzaktesisht se ku mund të ketë linjë ndonjë dhe çfarë trashëgimtari ka pasur ai aty. Po ku ka pasur, le të shkruhet tërësisht, siç po e shihni vetë ç’po bën dynjaja.
Ne i bëjmë një thirrje popullit dhe të gjithë institucioneve shtetërore që ta vënë dorën në zemër, mos ta lëshojnë këtë popull në gjakderdhje.
E keni parë edhe ju çfarë po bën policia tani dy ditë. Ne po rrimë më shumë në polici sesa te tokat tona. I bëjmë thirrje shtetit të na japë një rrugëzgjidhje, i bëjmë thirrje kësaj gjykate të na japë një rrugëzgjidhje. Ju falenderoj të gjithëve dhe me respekt”, tha një banor.
Ndërkohë një tjetër banor tregoi se është rikthyer nga Anglia për të mbrojtur tokat e tija, duke e konsideruar padrejtësi vendimin për ndërtimin e resortit në tokat e banorëve të fshatit Baks-Rrjoll.
"Xhaxhallarët e mi, babai im, gjyshi im janë gjallë. Duam drejtësi! Ju lutem shumë. Kemi ardhur prej Anglisë. Kam qenë sa kjo vajza kur kam çuar babain tim atje duke parë tokat tona, dhe sot nuk na lënë të ulem atje poshtë. Duam drejtësi! Është e drejta jonë. Sot kemi ardhur prej Anglisë, jemi gjallë, e kemi marrë edhe shi, edhe borë, edhe stuhi këtu. Dhe duam gjakun tonë! Nuk na ndalon asgjë. Nuk kemi ardhur vetëm për 15 gusht për të bërë pushime dhe për të thënë që jemi shqiptarë.
Ju lutem, duam drejtësi! Ajo toka është e jona. Vajza ime është gjallë. Xhaxhallarët e mi janë duke qarë për tokën e tyre. Babai im ka qenë në tokë, e ka çuar ambulanca. Gjyshi im po e ha jetën nga mërzia. Ka le, babai, gjyshi, stërgjyshi, katër stërgjyshërit kanë lënë atje.
Dhe sot na thonë se toka nuk është e jona. Kush është ai? Duam drejtësi! Duam drejtësi! Duam drejtësi! Duam drejtësi! Sot duam përgjigje! Sot! Të më përgjigjet shteti, i bëj thirrje Edi Ramës, policisë”, deklaroi ai.
Ndërkohë banorët bëjnë me dije se do të kërkojnë drejtësi, duke protestuar, por edhe duke ndjekur rrugën ligjore, sipas tyre po “grabiten” tokat ku banorët nxjerrin bukën e gojës./Piranjat News
