Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
AKTUALITET
Bileta e autobusit në Kamëz u rrit me 50 lekë, Partia e Lirisë kundër: Po rëndoni xhepat e qytetarëve
PiranjatPërditësimi i fundit 8 Nëntor 2025, 14:32
Partia e Lirisë kërkoi anulimin e rritjes me 10 lekë të tarifës së biletës së autobusit në Kamëz. Sekretarja për Marrëdhëniet me Publiku, Arla Merja tha se shërbimi nuk e justifikon çmimin, pasi qytetarët përballen çdo ditë me trafikun, rrugët e prishura dhe vonesa të autobusëve.
“Bashkia Kamëz së fundmi me anë të një vendimi të Këshillit Bashkiak ka vendosur rritjen e çmimit të biletës së autobusit nga 40 në 50 lekë, si dhe të abonesë mujore nga 1 200 në 1 400 lekë. Ky vendim është i padrejtë, i pamenduar dhe thellësisht i dëmshëm për qytetarët që përballen çdo ditë me çmime në rritje dhe shërbime publike që degradojnë nga dita në ditë”, deklaroi Arla Merja.
Gjithashtu Arla Merja denoncoi kushtet e këqija në transportin urban.
“Në vend që të përmirësojë cilësinë e transportit publik, Bashkia Kamëz ka zgjedhur të rëndojë mbi xhepat e qytetarëve. Autobusët që qarkullojnë në linjat Kamëz–Tiranë janë të amortizuar, shpesh pa ajër të kondicionuar, me ndenjëse të dëmtuara dhe kushte të papranueshme higjienike. Udhëtimi me to është lodhje dhe poshtërim për qytetarët që çdo mëngjes përpiqen të arrijnë në punë apo në shkollë.
Përveç kushteve të këqija, qytetarët përballen çdo ditë me vonesa të mëdha për shkak të trafikut galopant dhe mungesës së menaxhimit urban. Autobusët vijnë rrallë, shpesh plot përtej kapacitetit, dhe njerëzit detyrohen të udhëtojnë në këmbë, ngjeshur, në temperatura ekstreme. Këto nuk janë kushte për një qytet që pretendon të jetë pjesë e zhvillimit”, u shpreh Merja.
Pak ditë më parë Këshilli Bashkiak i Kamëz mori vendimin për rritjen e biletës nga 40 lekë në 50 lekë, ndërsa çmimi i abonesë së përgjithshme është rritur nga 1400 lekë në 1600 lekë.
