Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Cilat janë lagjet më problematike? Përmbytjet me dëme katastrofike në Vlorë, pronarët e bizneseve: Humbja mund të shkojë deri në rreth 100 mijë euro
r.llPërditësimi i fundit 5 Tetor 2024, 10:56
permbytjet
VLORË- Reshjet e dendura të shiut të rëna gjatë ditës së djeshme, kanë sjellë përmbytje të mëdha, duke shkaktuar një situatë kritike në qytetin bregdetar të Vlorë. Rrugët e qytetit vijojnë ende të mbuluara nga uji, ndërsa sipas raportimeve, situata më problematike është lagjet ‘Albano dhe Romina’, lagjia ‘Leg Sallat’, lagjia ‘28 nëntori’, zona te Xhamia, zona te Xhamia, lagja 'Rilindja', 'Skela', 'Pavarësia', rruga ‘Hasan Kushta’ rruga "Gjergj Araniti" aksi pranë Kishës Ortodokse dhe bibliotekës publike si dhe pjesë të bulevardit ‘Ismail Qemali’.
Mbrëmjen e djeshme 33 familje kanë kaluar natën në konviktin e qytezës studenti dhe atë të shkollës industriale ‘Pavarësia. Në disa lagje energjia vijon të mbetet e stakuar për të mos krijuar probleme pasi në disa kabina ka prezencë uji.
Dëmet kanë qenë shumta edhe për bizneset në Vlorë, ndonëse ende nuk ka një përllogaritje të saktë. Një farmacist, ka treguar për mediat dëmin e madh që i është shkaktuar biznesit të tij, i cili sipas tij përllogaritet në rreth 100 mijë euro.
"Niveli i ujit arriti rreth gjysmë metri brenda farmacisë. Humbja ime mund të jetë rreth 100 mijë euro", thotë ai, ndërsa rrëfen momentet e frikës kur ishte i mbyllur brenda, pa mundur të dalë.
"Kemi qëndruar 2 orë brenda. Janë pothuajse 20-50 biznese gjithë kjo rrugë. Kjo është hera e disatë, si një katastrofë.", ka thënë ai.
Një tjetër biznes i prekur ishin edhe lokalet, ku nga videot e publikuara dje në rrjetet sociale, shihej si rrjedha e ujit e cila vërshonte nëpër rrugë, mori para karrige dhe çadra. Një nga pronaret e këtyre lokale dëshmon se ka humbur më shumë se 20 milionë lekë nga përmbytjet e përsëritura.
“Dimër për dimër, këtu bëhet det. Jemi të detyruar ta rregullojmë çdo gjë nga vetja. Shteti nuk merr masa. Dëmi mund të jetë 1 milionë lek për pastrime, lyerje minimumi. Po jemi përmbytur nga 20 herë, më kanë vajtur 20 mln lekë, askush s’do t’ia dijë”, është shprehur ai.
Autoritetet vendore pritet të nisin punën për të bërë një bilanc të dëmeve të shkaktuar në gjithë Vlorën për shkak të përmbytjeve katastrofike që goditën qytetin.
