Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
Detaje/ Kush ishte e kaluara e Gilmando Dani, i dënuar për gjobvënie ndaj grupit të Shullazit
PiranjatPërditësimi i fundit 11 Nëntor 2025, 15:59
Një atentat me armë zjarri ka tronditur pasditen e sotme zonën pranë Aeroportit Ndërkombëtar të Tiranës (Rinas). Viktimë e sulmit mbeti Gilmando Dani, 47 vjeç, person i njohur për drejtësinë dhe i konsideruar si një ndër njerëzit më të afërt të Emiljano Shullazit. Ngjarja ndodhi rreth orës 14:20, në rrethrrotullimin e Rinasit, kur automjeti tip “Mercedes Benz S” me të cilin udhëtonte Dani u qëllua me breshëri plumbash nga një tjetër automjet në lëvizje. Sipas burimeve policore, autorët kanë qenë të pajisur me armë automatike dhe kanë hapur zjarr në drejtim të makinës së viktimës, duke e lënë atë të vdekur në vend.
Në automjet ndodhej edhe një tjetër person, Muçi Shaljani (i njohur edhe si Sheqeri), i cili ka mbetur i plagosur rëndë dhe është transportuar me urgjencë në spital. Forca të shumta policie kanë rrethuar zonën dhe kanë ngritur pika kontrolli në disa akse rrugore për të bërë të mundur kapjen e autorëve, të cilët janë larguar menjëherë pas ngjarjes.
Sipas të dhënave paraprake, Gilmando Dani sapo kishte zbritur nga një fluturim nga Barcelona, ndërsa autorët dyshohet se kishin informacion të saktë mbi lëvizjet e tij. Makina e tij u shndërrua në “shoshë” nga plumbat, duke lënë një skenë të rëndë në vendin e ngjarjes.
Kush ishte Gilmando Dani
Dani ishte dënuar në vitin 2018 me 12 vite burg si pjesë e grupit të strukturuar kriminal të Emiljano Shullazit, për akuzat e “shtrëngimit me anë të kanosjes për marrje pasurie” ndaj disa biznesmenëve në Tiranë. Ai u lirua nga burgu në tetor 2024, pas më shumë se 9 vitesh në qeli.
Gjatë viteve të kaluara, Dani i kishte shpëtuar dy atentateve të mëparshme: i pari në vitin 2011, dhe i dyti në 2015, ku ai udhëtonte së bashku me Emiljano Shullazin. Të dyja ngjarjet atëherë mbetën pa autorë.
Hetimet dhe pistat paraprake
Grupi hetimor ka sekuestruar pamjet nga kamerat e sigurisë në zonë dhe po punon për të zbuluar identitetin e autorëve. Një nga pistat kryesore është ajo e larjeve të hesapeve brenda botës së krimit, ndërsa nuk përjashtohet as mundësia e një konflikti të vjetër që ka vijuar pas daljes së Danit nga burgu. Policia e Shtetit dhe Prokuroria e Tiranës kanë nisur hetimet, ndërsa ngjarja ka shkaktuar tension dhe panik tek qytetarët që ndodheshin pranë aeroportit në momentin e atentatit. Vrasja e Gilmando Danit rikthen në vëmendje valën e vjetër të përplasjeve mes grupeve kriminale në Tiranë, dhe rihap dosje të vjetra që lidhen me grupin e Shullazit – një emër që për vite ka mbajtur peshë të madhe në botën e krimit në kryeqytet.
