Një aksident rrugor është raportuar mesditën e sotme në fshatin Aliko të Vlorës.
Për pasojë kanë mbetur t&e...
AKTUALITET
Dy anët e medaljes/ Artistët që zgjodhën të protestojnë dhe ata që preferuan heshtjen
PiranjatPërditësimi i fundit 26 Qershor 2026, 12:09
Prej 26 ditësh, në Shqipëri vijojnë protestat që kanë mbledhur mijëra qytetarë në sheshe. Përtej kërkesave dhe debatit politik që i shoqëron, protesta ka hapur edhe një diskutim tjetër: rolin e artistëve dhe figurave publike në momente të rëndësishme për shoqërinë.
Një pjesë e artistëve dhe personazheve të njohur kanë zgjedhur të jenë fizikisht pranë protestuesve ose të shprehin publikisht mbështetjen e tyre për kauzën. Mes tyre janë Mehdi Malkaj,Florjan Binaj, Dea Mishel, Fjorala Ponari, Fatma Haxhialiu, Dojna Mema, Alesjo Aliaj, Rizarta Hoxha, Adrola Dushi, Dea Vieri, Kejsi Tola, Alban Skënderaj, Jonida Maliqi dhe disa figura të tjera publike që kanë reaguar në rrjetet sociale ose janë parë në protestë.
Për shumë qytetarë, prania e tyre është interpretuar si një shenjë solidariteti dhe angazhimi qytetar, duke treguar se artisti nuk është vetëm një figurë publike, por edhe pjesë e realitetit social të vendit.
Nga ana tjetër, ka edhe emra të njohur që kanë zgjedhur të mos mbajnë një qëndrim publik ose të mos bëhen pjesë e protestave. Mes tyre janë Gaz Paja, Luana Vjollca, Noizy, Xhensila Myrtezaj, Ylli Limani, Elvana Gjata, Ledri Vula, Bora Zemani, vëllezërit Veshaj dhe artistë të tjerë që deri më tani nuk kanë reaguar publikisht.
Edhe heshtja mbetet një zgjedhje personale dhe legjitime. Megjithatë, kur bëhet fjalë për figura me ndikim te qindra mijëra ndjekës, mungesa e një reagimi shpesh interpretohet dhe komentohet nga opinioni publik.
Në rastin e Ylli Limanit, zhvillimi i një koncerti në të njëjtën ditë kur zhvillohej protesta u komentua nga një pjesë e publikut si një veprim i papërshtatshëm, ndërsa të tjerë e konsideruan thjesht respektim të angazhimeve profesionale.
Ndërkohë, Gaz Paja ka qenë shpesh objekt diskutimesh në media për afërsinë e perceptuar me përfaqësues të Partisë Socialiste. Emri i tij është përmendur gjithashtu lidhur me çështje që kanë të bëjnë me hetimet ndaj ish-kryebashkiakut Erion Veliaj. Por sa i përket viteve të fundit nuk i është bashkuar asnjë proteste apo lëvizjeje qytetare në vend.
Kjo ngre një pyetje që rikthehet sa herë shoqëria përballet me tensione apo protesta: cili duhet të jetë roli i artistit?
A duhet ai të jetë gjithmonë në krah të qytetarëve?
A ka një detyrim moral për të reaguar, apo arti duhet të qëndrojë i ndarë nga zhvillimet politike dhe shoqërore?
Përgjigjja nuk është e njëjtë për të gjithë. Askush nuk mund ta detyrojë një artist të marrë pjesë në një protestë apo të mbajë një qëndrim publik.
Megjithatë, historia ka treguar se në shumë momente të rëndësishme artistët kanë qenë ndër zërat më të fuqishëm të shoqërisë. Përtej skenës, muzikës apo humorit, arti ka qenë shpesh edhe formë ndërgjegjësimi dhe reagimi.
Nga ana tjetër, edhe heshtja është një mesazh. Publiku ka të drejtë ta interpretojë atë sipas këndvështrimit të vet, po aq sa artisti ka të drejtën të zgjedhë të mos përfshihet.
Në fund, debati nuk lidhet domosdoshmërisht me mbështetjen e një force politike apo një tjetre. Ai lidhet me zgjedhjen që bën një figurë publike kur përballë saj ka një lëvizje qytetare: të jetë pjesë e saj, të mbajë distancë ose të mos reagojë fare.
Dhe pikërisht këtu janë dy anët e medaljes: ata që zgjodhën të ishin në shesh dhe ata që vendosën të qëndronin në heshtje./Piranjat News
