Një 53-vjeçar është arrestuar në flagrancë në fshatin Bunec, pasi dyshohet se ka qëlluar me armë zjarri në...
AKTUALITET
Dyshohej se tentoi të vrasë kushëririn në Itali, autoritetet mbyllin çështjen ndaj shqiptarit nga Kosova, mungojnë provat (EMRI)
n.fPërditësimi i fundit 27 Maj 2025, 14:47
ITALI- Çështja ndaj shqiptarit nga Kosova, Edmond Balaj është mbyllur për shkak të mungesës së provave. Balaj akuzohej për tentativën e vrasjes së kushëririt të tij Hajdin Kukiqi. Vendimi u mor nga gjyqtari hetues Carlo Colombo, i cili pranoi kërkesën për arkivim të paraqitur nga prokurori publik Giovanni Valmassoi.
Përkundër dyshimeve të shumta që rëndonin mbi 34-vjeçarin me origjinë nga Kosova, i mbrojtur nga avokatja Alessandra Nava, hetimet e hollësishme të Prokurorisë nuk arritën të konfirmojnë përgjegjësinë e tij për ngjarjen që ndodhi më 7 mars 2024 në Chiarano. Sipas autoriteteve hetimore, provat e mbledhura nuk janë të mjaftueshme për të përballuar një proces penal, dhe për rrjedhojë, nuk parashikohen hetime të mëtejshme përveç nëse dalin elementë të rinj në të ardhmen.
Mëngjesin e 7 marsit, Hajdin Kukiqi, 37 vjeç, punëtor në kompaninë Lafert në Noventa di Piave, u qëllua me armë zjarri nga dy persona të maskuar që i ishin afruar me skuter pranë banesës së tij. Ai u godit në këmbë dhe në bark, por mbijetoi pas një ndërhyrjeje kirurgjikale të ndërlikuar në spitalin e Trevisos.
Që nga spitali, Kukiqi i kishte treguar hetuesve për një seri mosmarrëveshjesh të vjetra me kushëririn e tij Edmon Balaj, duke përmendur konflikte të pasura me prapavijë pronësore dhe kërcënime të mëparshme. Ai ishte shprehur se Balaj ishte “i vetmi person me të cilin kishte çështje të hapura”. Nga frika për hakmarrje të mundshme, kishte dërguar fëmijët e tij të jetonin në Gjermani me prindërit e bashkëshortes.
Balaj u arrestua më 8 maj 2024, disa ditë pas rikthimit në Itali nga Kosova. Në banesën e tij në Salgareda, autoritetet sekuestruan një xhaketë, karrocerinë e një skuteri, një telefon celular dhe disa gëzhoja plumbash. RIS-i i Karabinierëve të Parmës identifikoi gjurmë baruti në veshjet e tij, të cilat përputheshin me ato në gëzhojat e gjetura në vendin e ngjarjes.
Megjithatë, mbrojtja pretendoi një version tjetër se Balaj kishte frekuentuar një poligon qitjeje në Kosovë dhe baruti mund t’i ishte ngjitur rrobave gjatë atij aktiviteti. Nga burgu, Balaj mohoi çdo përfshirje në atentat: “Nuk kam të bëj fare me tentativën e vrasjes së kushëririt tim. Nuk isha as në Itali në fillim të marsit. Ajo që është thënë për mua është serioze dhe e rreme. Kushdo që foli në atë mënyrë duhet të mbajë përgjegjësi”. Ai ka kallëzuar Kukiqin për shpifje.
Pavarësisht mbylljes së këtij hetimi, Balaj vazhdon të vuajë një dënimin prej 5 vjetësh e 4 muajsh për vepra të tjera penale, përfshirë trafik droge, lëndime personale dhe armëmbajtje pa leje, që datojnë që nga viti 2014.
