Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Sinamati i arrestuar në Dubai dyshohet se porositi shpërthimin te shtëpia e gazetarit/ Ranucci: Nuk janë shumë njerëz që mund të kryejnë akte të tilla
PiranjatPërditësimi i fundit 20 Tetor 2025, 18:59
Altin Sinomati, shtetas shqiptar 38 vjeç, u arrestua në Abu Dhabi pasi kishte ikur nga Italia për t’i shpëtuar drejtësisë. Ai konsiderohet si porositësi i vrasjes së Selavdi Shehaj, i njohur me nofkën “Passerotto”, i vrarë më 20 shtator 2020 në plazhin e mbushur me njerëz të Torvaianicës.
I njëjti person që vrau “Passerotto”-n kishte vrarë edhe Fabrizio Piscitellin, i njohur si “Diabolik”, një vit më parë. Plazhi ku ndodhi vrasja ndodhet vetëm 100 metra larg shtëpisë së gazetarit Sigfrido Ranucci, ndaj të cilit kishte një atentat më 16 tetor të këtij viti. Hetimet, të kryera nga karabinierët e njësisë hetimore të Romës, policia dhe SCO e Policisë së Shtetit, kanë nxjerrë një dosje kundër Sinomati.
Sinomati kishte dhënë urdhrin për vrasjen e Shehaj duke i paguar Raul Esteban Calderon-it shumën prej 150,000 eurosh për kryerjen e krimit.
Për këtë vrasje, Raul Esteban Calderon u dënua me burgim të përjetshëm si ekzekutues, ndërsa Giuseppe Molisso u dënua për bashkëpunim në krim. Calderon është gjithashtu i dënuar me burgim të përjetshëm për vrasjen e Piscitellit. Sinomati është i akuzuar edhe në një tjetër proces penal, ku është konsideruar si një nga kanalet kryesore të furnizimit me kokainë të organizatës kriminale që operon në Romë, e drejtuar nga Giuseppe Molisso dhe Leandro Bennato. Kjo organizatë u çmontua në një operacion policor më 18 mars 2025.
Pas këtij operacioni dhe arrestimit të Calderon, Sinomati arriti t’i shpëtonte arrestimit duke u larguar në Emiratet e Bashkuara Arabe, ku u kap dhe u arrestua dhjetë ditë më parë. Një nga pistat e hetimit për atentatin ndaj gazetarit Ranucci lidhet me krimin e organizuar shqiptar në zonë, që është në qendër të hetimeve të emisionit “Report”.
Ky krim, lidhet me botën e tifozëve ultras dhe bossin Michele Senese, i përfshirë në luftërat midis klaneve për kontrollin e trafikut të drogës në Romë dhe në zonën bregdetare. Ranucci, në një intervistë për gazetën “Repubblica”, kishte kujtuar vrasjen e “Passerotto”-s dhe kishte reflektuar mbi mundësinë e porositësve të atentatit ndaj tij.
“Nuk janë shumë njerëz që mund të kryejnë veprime të këtilla”, kishte thënë gazetari, duke theksuar rolin e krimit të organizuar shqiptar në zonë, i lidhur me ish-narkomanin dhe ultrasin Fabrizio Piscitelli, i përfshirë në shumë hetime të “Report”./ La Repubblica
