Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Ekzekutoi kamarierin e më pas mbeti viktimë edhe vetë, Flori Paluçi i skeduar për përfshirje në krime të ndryshme
PiranjatPërditësimi i fundit 22 Tetor 2025, 09:28
Një ngjarje e rëndë me pasojë dy viktima është shënuar rreth orës 01:45 të mëngjesit të sotëm në Manëz, pranë një karburanti. Sipas burimeve zyrtare nga policia, konflikti i përgjakshëm ka nisur pas një debati për një kafe dhe ka përfunduar me përdorimin e armëve të zjarrit.
Të vrarë kanë mbetur Flori Paluçi, 33 vjeç, dhe Arianit Kurti, 23 vjeç, të dy banues në Manëz. Hetimet paraprake tregojnë se ngjarja ka nisur në ambientet e një lokali pranë karburantit, ku një prej viktimave ka kërkuar një kafe nga kamerieri, i cili ka deklaruar se ekspresi ishte jashtë funksioni. Pas kësaj, ka ndërhyrë një tjetër person, i cili ndodhej në lokal, duke përshkallëzuar situatën në konflikt verbal dhe më pas në përplasje të armatosur.
Sipas hetuesve, dyshohet se Flori Paluçi ka qëlluar me armë ndaj Arianit Kurtit, i cili mbeti i vdekur në vend, ndërsa më pas Paluçi është vrarë nga Daniel Pepa, 21 vjeç, banues në Manëz, i cili është shpallur në kërkim nga policia si autori i dyshuar i ngjarjes.
Forcat e rendit kanë nisur kontrolle intensive në zonë për kapjen e Pepës, ndërsa grupi hetimor, nën drejtimin e Prokurorisë së Durrësit, po vijon punën për zbardhjen e plotë të rrethanave dhe identifikimin e të gjithë personave të përfshirë në konflikt.
Burime nga hetimet bëjnë me dije se Flori Paluçi ishte një emër i njohur për policinë dhe drejtësinë italiane, i skeduar për përfshirje në krime të ndryshme, përfshirë dhe pjesëmarrje në një grup të strukturuar grabitësish që vepronte në territorin italian.
Nga ana tjetër, autori i dyshuar i vrasjes, 21-vjeçari Daniel Pepa, është një emër i njohur për policinë si një i ri problematik. Ai njihet për përfshirje në konflikte të ndryshme dhe sjellje të dhunshme në zonë. Aktualisht, Pepa është në kërkim nga policia, e cila ka nisur një operacion të gjerë për lokalizimin dhe arrestimin e tij.
