EMRAT/ "Merrnin para që mos t'i prishnin banesat!" Bashkëpunim me dy punonjës të IMT Elbasan, detaje nga arrestimi i 51-vjeçarit

Personi i përfshirë

ELBASAN- Ditën e sotme është arrestuar me urdhër të Prokurorisë së Posaçme 51-vjeçari Gentian Bako i lidhur me rastin e abuzimit nga punonjësit e IMT Elbasan me një rast të prishjes së një banese. Bako ishte i shpallur në kërkim për veprën penale “Korrupsioni aktiv i personave që ushtrojnë funksione publike”.

Bëhet me dije e dosja ishte hapur fillimisht nga prokuroria në Elbasan ku u proceduan me masën e sigurisë “arrest në burg” kryeinspektori i IMT-së, Andri Mehja dhe inspektori Bardhyl Qehja. Nga këto hetime ka rezultuar se Bako ka bashkëpunuar me dy personat e tjerë për marrjen ryshfetit nga një qytetar që të mos i prishej shtëpia.

Para disa kohësh, denoncimi u bë në emisionin “Stop” ku u zbulua rasti i korrupsionit tek drejtuesit e IMT së Elbasanit. Nga kjo rezultoi se një biznesi në Elbasan i kishin vënë një gjobë për ndërtimin e një tende pa leje. Me anë të një sekseri, kryeinspektori i IMT-së Andri Mehja, i ka kërkuar qytetarit një ryshfet prej 2 milionë e gjysmë Lekë për të reduktuar masën e gjobës nga 17 milionë në 5 milionë Lekë. Kryeinspektori i IMT-s premtoi se do të ulte gjobën. Fillimisht Mehja mori si kapar 300 mijë Lekë të vjetra dhe më pas edhe pjesa tjetër prej 2 milionë e 200 mijë lekë të tjera iu dha në dorë kyeinspektorit brenda një automjeti.

NJOFTIMI I POLICISË: 

Në zbatim të masave të përcaktuara në kuadër të planit operacional “Sundimi i ligjit” u finalizua operacioni policor i koduar “Deceit “.

Ndalohet një 51-vjeçar i shpallur në kërkim për veprën penale “Korrupsioni aktiv i personave që ushtrojnë funksione publike”.

Si rezultat i kërkimeve dhe administrimit të informacioneve të inteligjencës policore, të kryera në vijim të megaoperacionit kombëtar të koduar “Sundimi i ligjit”, me objektiv ndalimin e shtetasve të shpallur në kërkim, Seksioni për Hetimin e Krimeve Ekonomike dhe Financiare në bashkëpunim me forcën e Posaçme Shqiponja të DVP Elbasan finalizoi operacionin policor të koduar “Deceit”.

Në kuadër të operacionit u kap dhe u ndalua shtetasi në kërkim G. B., 51 vjeç, banues në Elbasan, pasi Prokuroria e Posaçme Kundër Korrupsionit dhe Krimit të organizuar Tiranë, me vendimin e datës 29.08.2024, ka urdhëruar ndalimin e tij, për veprën penale “Korrupsioni aktiv i personave që ushtrojnë funksione publike”

Ndalimi i këtij shtetasi u bë pasi në muajin prill 2024, ka bashkëpunuar me dy punonjës të IMT Elbasan, për marrje rryshfeti, në lidhje me një objekt të ndërtuar pa leje.

Materialet i kaluan Prokurorisë së Posaçme Kundër Korrupsionit dhe Krimit të organizuar, për veprime të mëtejshme.

elbasan