PiranjatPërditësimi i fundit 13 Nëntor 2025, 09:18
Blutë e kryeqytetit kanë finalizuar operacionin policor të koduar “Saga”, duke vënë në pranga një 37-vjeçar të dyshuar për disa raste vjedhjesh me thyerje në kryeqytet.
Sipas njoftimit zyrtar, është arrestuar Ndriçim Koka, 37 vjeç, banues në Tiranë, i cili rezulton i dënuar më parë në Greqi për vjedhje.
Hetimet treguan se ky shtetas, më 8 nëntor 2025, ka vjedhur 12 milionë lekë në një banesë në rrugën “Artan Lenja”. Po ashtu, më 19 tetor 2025, ai kishte kryer një tjetër vjedhje me thyerje në një kioskë në rrugën “Muhamet Gjollesha”, ku kishte marrë produkte me vlerë rreth 50 mijë lekë.
Njoftimi i policisë
Tiranë/Finalizohet operacioni policor i koduar “Saga”.
5 ditë më parë, vodhi 12 milionë lekë, në një banesë, identifikohet dhe kapet 37-vjeçari, i dënuar më parë, në Greqi, për të njëjtin krim.
Nga hetimet rezultoi se ky shtetas ka kryer një vjedhje me thyerje, më 19 tetor, ndërsa nga kontrollet rezultoi se mbante në banesë, sasi Cannabisi.
Sekuestrohen sendi i fortë që përdorte 37-vjeçari, për vjedhjet me thyerje, veshje që ai kishte mbajtur gjatë këtyre rasteve, si dhe sasia e lëndës narkotike.
Si rezultat i hetimeve intensive të kryera me qëllim zbardhjen e vjedhjeve dhe identifikimin dhe nxjerrjen e autorëve të tyre, përpara përgjegjësisë penale, shërbimet e Komisariatit të Policisë Nr. 2 finalizuan operacionin “Saga”, në kuadër të të cilit u kap dhe u vu në pranga shtetasi N. K., 37 vjeç, banues në Tiranë.
Nga veprimet hetimore dyshohet se ky shtetas: -më datë 08.11.2025, ka vjedhur 12 milionë lekë, në një banesë në rrugën “Artan Lenja”; -më datë 19.10.2025, ka vjedhur me thyerje, produkte me vlerë rreth 50 000 lekë, në një kioskë në rrugën “Muhamet Gjollesha”.
Punohet për zbardhjen e vjedhjeve të tjera që mund të ketë kryer shtetasi N. K.
Materialet procedurale iu referuan Prokurorisë së Tiranës, për veprime të mëtejshme.
