Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
Familjarët e Besnik Koçiut nxjerrin detaje të rënda: Ai vuante nga ishemia por e lanë të vdiste në qeli
PiranjatPërditësimi i fundit 13 Shtator 2025, 17:41
Familjarët e Besnik Koçiut kanë bërë përgjegjës institucionet shtetërore për vdekjen e 51-vjeçarit në ambientet e burgut, menjëherë pasi Gjykata e Tiranës vendosi masën e sigurisë “arrest me burg” në kuadër të dyshimit për plagosje me armë në një lokal në Valias.
Familjarët e të ndierit kanë ngritur akuza ndaj institucioneve duke pretenduar se Koçiu ka pësuar probleme shëndetësore për më shumë se 5 orë brenda qelisë së izoluar, pa asnjë ndihmë mjekësore.
“Ai vuante nga goditje në tru, diabet dhe sëmundje të tjera serioze. Nuk duhej të qëndronte as një orë në paraburgim pa marrjen e masave për shëndetin e tij. Kërkojmë që të hapen kamerat e paraburgimit dhe të zbardhet e vërteta e vdekjes së Besnikut. Nuk kemi asnjë përgjigje nga shteti” tha Eranda Sejdini, e afërme e të ndjerit.
Ndërkohë vëllai i viktimës, Maksim Koçiu pohoi se gjendja shëndetësore e Besnikut ishte rënduar por askush nga autoritetet nuk i kanë dhënë ndihmën e nevojshme mjekësore.
Familja ka depozituar një kallëzim penal në prokurori, duke kërkuar hetim të plotë të ngjarjes dhe përgjegjësi për personat që mund të jenë përfshirë në moskryerjen e detyrës. Vëllai Maksim shtoi se nuk do të ndalet derisa të bëhet drejtësi dhe të gjendet përgjegjësia për vdekjen e Besnikut.
“Nga gjykata deri te burgu, është bërë neglizhencë totale. Nuk i dhanë asnjë ndihmë. Dua të shoh dosjen, të shikoj kamerat dhe të sigurohem që çdo përgjegjës të marrë dënimin e merituar”, u shpreh vëllai i Besnikut.
Gjykata e Tiranës, që caktoi masën e arrestit me burg më 15 korrik, nuk mori në konsideratë kërkesën e avokatit për një masë më të butë sigurie, pavarësisht gjendjes së rënduar shëndetësore të të ndjerit.
