Përdoruesit e platformave Facebook, Instagram dhe Messenger kanë raportuar probleme me funksionimin e tyre pasditen e së mërkurës, 22...
AKTUALITET
Fletëthirrja nga SPAK për Berishën, reagon Bardhi: Nuk kemi refuzuar asgjë! S’ka letra në kutitë tona postare
PiranjatPërditësimi i fundit 14 Nëntor 2025, 16:02
Kryetari i Grupit Parlamentar të Partisë Demokratike, Gazment Bardhi, ka reaguar pas deklarimeve të bëra sot në lidhje me një njoftim të SPAK-ut drejtuar grupit parlamentar të PD-së, lidhur me fletëthirrjen e Sali Berishës.
Në një reagim për mediat, Bardhi mohoi kategorikisht që një njoftim i tillë të ketë mbërritur ndonjëherë në adresë të grupit, duke e cilësuar situatën si një keqpërdorim politik.
Reagimi i Bardhit:
Prokuroria e Posaçme kundër Korrupsionit dhe Krimit të Organizuar nuk ka dërguar asnjë njoftim drejtuar Grupit Parlamentar të Partisë Demokratike dhe për pasojë stafi politik i grupit nuk ka patur çfarë të refuzojë. Referimi nga SPAK i një gënjeshtre të thënë nga Kuvendi i Shqipërisë meriton vetëm përbuzje. Vetë SPAK ishte në dijeni të faktit se nuk ka dërguar ndonjë njoftim drejtuar Grupit tonë Parlamentar dhe për pasojë nuk mund të keqinformojë median mbi fakte të shtrembëruara për interesa politike nga ana e Kuvendit të Shqipërisë. Po ashtu, Prokuroria e Posaçme apo vetë Kuvendi është në dijeni të rolit dhe përgjegjësive të një grupi parlamentar dhe stafeve të tyre politike, ku “ofrimi i shërbimeve postare” nuk hyn në fushën tonë të përgjegjësisë!
Rezulton e provuar se në kutitë postare të asnjë deputeti të grupit tonë parlamentar, që ndodhen brenda ambienteve të Kuvendit, nuk ka të depozituar asnjë njoftim të dërguar nga SPAK nga ana e administratës së Kuvendit të Shqipërisë. Sa më lart, shprehim keqardhje për keqpërdorimin politik të Prokurorisë së Posacme, për propagandë dite të inskenuar nga mazhoranca socialiste në Kuvendin e Shqipërisë. Kryetari i Partisë Demokratike, Sali Berisha nuk është paraqitur në Prokurorinë e Posaçme si person në dijeni, në kuadër të hetimeve për dosjen e 21 janarit, ku u vranë 4 qytetarë në bulevard gjatë një protestë të opozitës së asaj kohe.Mësohet se fletëthirrje e mbërritur në Kuvend për Sali Berishën nuk është tërhequr nga Grupi Parlamentari i Partisë Demokratike. Kuvendi ka njoftuar Prokurorinë e Posaçme, se fletëthirrja nuk është tërhequr, por Grupi i PD shprehet se nuk i ka ardhur asnjë letër.
Një ditë më parë, Berisha i pyetur nga gazetaret nëse do të paraqitet për dosjen e 21 janarit, kreu i PD tha: “Por ka vetëm një kusht, që unë të marr thirrjen. Ata që përdorin këtë për propagandë për të mbuluar skandalin Rama-Balluku të tunelit të Llogarasë apo skandalin e aeroportit të Vlorës ata tregojnë se janë shërbëtorë mjeranë të një bandë që vjedh ditë e natë qytetarët shqiptarë”.
