Këtë të enjte, një ditë pas aksidentit tragjik, do t’i jepet lamtumira e fundit ish-banorit të Big Brother VIP Kosova, Lau...
AKTUALITET
FOTO/ Fadromat e oligarkëve të ndërtimit shkatërrojnë Kurorën e Gjelbër të Tiranës
M.B.Përditësimi i fundit 8 Janar 2025, 10:41
TIRANA- Pak muaj më parë, kur Erion Veliaj u paraqit për herë të parë në SPAK për të dhënë sqarimet e tij mbi skandalin korruptiv “5D”, vizita e tij u parapri nga punonjësit e Bashkisë së Tiranës që mbollën disa pemë rreth godinës së Prokurorisë së Posaçme.
Ishte një operacion i rëndomtë propagandistik, për të cilin Veliaj duket se ishte i bindur që do të merrte përmasat e duhura mediatike, falë edhe prezencës së shtuar të gazetarëve që ndjekin aktivitetin e përditshëm të SPAK-ut.
Por, larg kamerave, e vërteta është se “kurora e gjelbër” e Tiranës po shkatërrohet me shpejtësi nga dita në ditë, për t’i lënë vendin betonit.
“Boldnews.al” ka konstatuar ditën e djeshme (e martë, 7 janar 2025) disa pamje se si po shkatërrohet një sipërfaqe shumë e madhe pyjore në kodrën që gjendet në pjesën fundore të Kopshtit Zoologjik, në Tiranë.
Një mjet i rëndë dallohet duke krijuar një sipërfaqe të sheshtë në mes të kurorës së gjelbër, i pashqetësuar nga askush.
Në pamje të tjera, dallohet qartë një sipërfaqe e tërë me pemë të prera, nga të cilat kuptohet se punimet për shkatërrimin e pyllit vijojnë prej ditësh.
Redaksia nuk arriti të konstatonte ndonjë tabelë punimesh dhe cili entitet po e kryente procesin shkatërrimtar të pyllit.
Deri më tani, asnjë institucion, qendror apo vendor, nuk është dukur në atë zonë, më së paku për të parandaluar e më tej për të vënë para përgjegjësisë ligjore personat që po shkatërrojnë sipërfaqen pyjore apo zyrtarët që kanë detyrën për të mbrojtur sipërfaqen e gjelbër.
Nga pamjet e siguruara prej redaksisë, krijohet përshtypja se i gjithë punimi shkatërrues në atë zonë po kryhet për të krijuar truall ndërtimor.
Një sipërmarrje e tillë, me shkatërrim pylli, e shoqëruar me “neglizhencë” institucionale duket se mund të jetë paraprirje për ndërtime betoni në atë zonë. Pas shkatërrimit të pyllit, mund të dalë dikush më pas e të tregohet “i/e habitur” se si u ngritën pallatet./ Boldnews.al
