Gazetari Osman Stafa ka publikuar pamjet nga kamera e sigurisë së një prej bizneseve në zonën e Medresesë, aty ku më herë...
AKTUALITET
GJKKO lë në burg Juxhin Kokën, i akuzuar për vjedhjen e 200 mijë litrave naftë nga një anije në Durrës dhe korruptoi efektivin e policisë
PiranjatPërditësimi i fundit 23 Tetor 2025, 16:32
GJKKO ka vendosur masën e 'arrestit në burg' për 31-vjeçarin Juxhin Koka, i cili u ekstradua nga Spanja pas akuzave për korrupsion dhe vjedhje në bashkëpunim. SPAK e akuzon atë për dhënien e 10 mijë euro ryshfet një punonjësi të policisë dhe për vjedhjen e 200 mijë litra naftë nga një anije që ishte ankoruar në portin e Durrësit.
Juxhin Koka dhe Drilon Malluta, dy shtetas shqiptarë, akuzohen se ofruan ryshfet prej 10 mijë euro për punonjësin e policisë Armand Marvataj, për të lejuar nxjerrjen e naftës së sekuestruar nga anija më 27 janar 2025. Nafta ishte sekuestruar në kuadër të operacionit të koduar “Ari i Zi” nga Drejtoria Vendore e Policisë Durrës. Sipas hetimeve, edhe pse nafta ishte nën sekuestrim, ajo u transportua në mënyrë të paligjshme jashtë anijes gjatë natës.
Gjatë kontrollit në shtëpinë e Armand Marvataj, punonjësit të policisë, u gjet dhe u sekuestrua shuma prej 10 mijë euro, që konsiderohet si provë materiale e veprës penale të korrupsionit aktiv.
Në këtë skemë të vjedhjes dhe kontrabandës, janë të përfshirë edhe shtetas të huaj. Pjesëmarrësit në këtë operacion kriminal janë të ndarë në grupe, përfshirë Mohammad Sallit, kapitenin e anijes, dhe Nedio Mejdani, oficerin e parë, si dhe anëtarët e ekuipazhit si Samir Bayoumy (inxhinier i tretë), marinarët Hasan Broud, Sami Shanata, Faez Ismaeil, Wissam Rostom dhe Abdoulmohaimen Shanata, shtetas sirianë dhe një egjiptian.
Njoftimi i GJKKO:
1. Kërkuesi Prokuroria e Posaçme kundër Korrupsionit dhe Krimit të Organizuar me datë 23.10.2025 ka paraqitur pranë Gjykatës kërkesën me objekt: “1. Verifikimin e kushteve të zbatimit të masës së sigurimit dhe nevojat e sigurimit personal të vendosura për të pandehurin Juxhin Koka; 2. Vazhdimin e zbatimit të masës së sigurimit “arrest në burg”, të parashikuar nga neni 238 i K.Pr.Penale për të pandehurin Juxhin Koka, i biri i M. dhe i N., i datëlindjes ****, lindur dhe banues në ****, me numër personal ****, i akuzuar për kryerjen e veprave penale “Kondrabandë për mallrat për të cilat paguhet akcizë, ose me pezullim të plotë apo të pjeshëm, nga detyrimet doganore, ose të akcizës” kryer në bashkëpunim, “Korrupsioni aktiv i personave që ushtrojnë funksion publike” kryer në bashkëpunim, dhe “Vjedhja” kryer në bashkëpunim, parashikuar nga nenet 172/3 e 25, 244 paragrafi 2 e 25, 134/3 e 25 të Kodit Penal.”.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Rudina Palloj, bazuar në nenet 112, 248, 228, 229 dhe 230 të K.Pr.Penale, me vendimin nr. 110, datë 24.10.2025, vendosi:
1. Vazhdimin e zbatimit ndaj të pandehurit Juxhin M. Koka, të masës së sigurimit personal “Arrest në burg”, parashikuar nga neni 238 i K.Pr.Penale, i akuzuar për kryerjen e veprave penale “Kondrabandë për mallrat për të cilat paguhet akcizë, ose me pezullim të plotë apo të pjeshëm, nga detyrimet doganore, ose të akcizës” kryer në bashkëpunim, “Korrupsioni aktiv i personave që ushtrojnë funksion publike” kryer në bashkëpunim, dhe “Vjedhja” kryer në bashkëpunim, parashikuar nga nenet 172/3 e 25, 244 paragrafi 2 e 25, 134/3 e 25 të Kodit Penal, caktuar me vendimin nr. 18, datë 19.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar.
2. Ngarkohet Prokuroria e Posaçme Kundër Korrupsionit dhe Krimit të Organizuar dhe shërbimet e policisë gjyqësore për ekzekutimin e këtij vendimi.
3. Kundër këtij vendimi mund të bëhet ankim në Gjykatën e Apelit për Korrupsionin dhe Krimin e Organizuar brenda 5 (pesë) ditëve, duke filluar ky afat nga e nesërmja e komunikimit të vendimit.
