Ish-zëvendëskryeministrja Belinda Balluku është paraqitur këtë të martë në ambientet e Prokurorisë s...
AKTUALITET
Gjyqi për Metamorfozën/ Të pandehurit kërkojnë ndarjen e çështjeve, Pëllumb Gjoka tërhiqet nga gjykimi i shkurtuar
PiranjatPërditësimi i fundit 17 Prill 2025, 11:07
TIRANË- Në GJKKO po mbahet seanca për gjyqin e dosjes Metamorfoza. Biznesmeni Pëllumb Gjoka, i arrestuar për dosjen “Metamorfoza”, ka vendosur të tërhiqet nga përfitimi i gjykimit të shkurtuar. Sipas avokatit të biznesmenit, ndarja e çështjes dhe mënyra e administrimit të provave përbën një dëm të drejtëpërdrejtë për klientin, ndërkohë që shpresa për një qëndrim të prerë nga Gjykata Kushtetuese lidhur me vlefshmërinë e provave të siguruara përmes aplikacionit SKY ECC nuk është materializuar.
“Patëm pritshmëri që Gjykata Kushtetuese të deklaronte të pavlefshme provat e marra nga komunikimet në SKY ECC, por për fat të keq kemi një vendim ‘as mish, as peshk’,” deklaroi avokati.
Ndërkohë të pandehurit e tjerë kanë kërkuar gjykim të shkurtuar. Arben Nela, avokati i ish-prokurorit Xhevahir Lita, i kërkoi gjykatës ndarjen e çështjes për klientin e tij, duke argumentuar se: “Hetimi ndaj Litas ka qenë i plotë. Ai ka paraqitur kërkesë për gjykim të shkurtuar.”
Në të njëjtën linjë, Gentian Rumano, përfaqësuesi ligjor i Ardit Hasanbegaj, kërkoi gjithashtu ndarjen e çështjes së klientit të tij.
“Kërkoj gjykim të shkurtuar për klientin tim. Kjo kërkesë është bërë që në seancën paraprake dhe është shënuar në çdo deklaratë. Mendojmë se çështja mund të zgjidhet në gjendjen ku ndodhen aktet, pasi nuk kemi prova të tjera për të paraqitur. Nëse pranohet, kërkojmë edhe veçimin e çështjes,” tha Rumano.
Edhe mbrojtësit ligjorë të Astmer Bilalit, Oltion Bistrit dhe Behar Bajroviqit paraqitën kërkesa për gjykim të shkurtuar. Elton Domi, avokati i Oltion Bistrit, u shpreh: “Nuk kemi kërkesa për marrjen e provave të reja, as për pavlefshmëri të provave ekzistuese. Kërkojmë që çështja ndaj tij të trajtohet e ndarë.”
Ndërsa Elton Hyseni, përfaqësuesi ligjor i Behar Bajroviqit, deklaroi: “Kërkojmë gjykim të shkurtuar. Lidhur me ndarjen e çështjes, ia lëmë vlerësimit të gjykatës.”
Ndërkohë pritet që gjykata të vendosë mbi kërkesat për gjykim të shkurtuar dhe ndarjen e çështjeve në seancat në vijim.
