Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
AKTUALITET
I dënuar në Itali me 29 vite burg dhe ishte strehuar në Kuçovë, arrestohet 49-vjeçari! Në pranga edhe personi që e mbante në shtëpi
PiranjatPërditësimi i fundit 23 Tetor 2025, 10:12
Policia e Beratit ka vënë në pranga një 49-vjeçar, Armando Pjetri, i dënuar në Itali me 29 vite burg për trafik të lëndëve narkotike dhe pjesëmarrje në një organizatë kriminale. Pjetri, i cili ishte në kërkim ndërkombëtar, u kap dhe u arrestua pasi strehohej në Kuçovë, me ndihmën e një bashkëpunëtori të tij.
Bashkëpunëtori, një 53-vjeçar nga Kuçova, u arrestua gjithashtu. Ai akuzohet për veprat penale "Përkrahja e autorit të krimit" dhe "Prodhimi dhe shitja e narkotikëve". Sipas hetimeve, 53-vjeçari ka ndihmuar Pjetrin të fshihet nga policia dhe të shmangë arrestimin.
Njoftimi i policisë:
Berat/Finalizohet operacioni policor i koduar “Rrjeta”.
Operacioni, nga DVP Berat, në bashkëpunim me Komisariatin e Policisë Kuçovë dhe me Drejtorinë e Forcës së Posaçme Operacionale të DPPSh-së.
I dënuar në Napoli, me 29 vjet burgim, për pjesëmarrje në një organizatë kriminale, për trafikim të lëndëve narkotike, kapet 49-vjeçari.
Arrestohet në flagrancë 53-vjeçari që strehonte në Kuçovë, shtetasin e shpallur në kërkim ndërkombëtar.
Në këtë banesë u gjet një sasi Cannabisi.
Si rezultat i një pune operacionale të mirorganizuar, të kryer nga Drejtoria Vendore e Policisë Berat, në bashkëpunim me Komisariatin e Policisë Kuçovë dhe me DFPO-në, në drejtimin e Prokurorisë së Beratit, u finalizua operacioni “Rrjeta”.
Në kuadër të operacionit, u vunë në pranga: -shtetasi i shpallur në kërkim ndërkombëtar, Armando Pjetri, 49 vjeç;
-shtetasi A. H., 53 vjeç, banues në Kuçovë, për veprat penale “Përkrahja e autorit të krimit”, dhe “Prodhimi dhe shitja e narkotikëve”.
Gjykata e Apelit në Napoli e ka dënuar 49-vjeçarin, që strehohej nga 53-vjeçari, me 29 vjet burgim, për veprën penale “Trafikimi i lëndëve narkotike”, kryer në kuadër të organizatës kriminale.
Në banesën ku strehohej shtetasi i kërkuar ndërkombëtarisht, në lagjen “1 Maji”, u gjet një sasi lënde narkotike Cannabis Sativa që u sekuestrua me cilësinë e provës materiale.
Interpol Tirana vijon bashkëpunimin me Interpol Romën, për të finalizuar procedurën për ekstradimin e shtetasit Armando Pjetri, në Itali. Ndërkaq, materialet procedurale iu referuan Prokurorisë së Beratit, për veprime të mëtejshme.
