I mori 10 mijë euro pronarit të një lokali duke e shantazhuar, GJKKO lë në burg shefin e anti-drogës në Durrës, Gazmir Preçi: Nuk e dija që në pako kishte lekë

Gazmir Preçi

TIRANË- GJKKO ditën e sotme ka marrë vendimin për të lënë në burg shefin e anti-drogës në Durrës, Gazmir Preçi. Preçi u arrestua pasi ai i mori 10 mijë euro pronarit të një lokali duke e shantazhuar. Arrestimi i Preçit u bë pas denoncimit të pronarit të lokalit “Night”, një klub nate te Ura e Dajlanit. Sipas denoncimit të tij, shefi i Antidrogës e kërcënonte se do i mbyllte biznesin me pretendimin se kishte të punësuar disa persona të pasiguruar, çka nuk është në kompetencën e tij për ta kontrolluar.

Shuma prej 10 mijë eurosh u mor në një takim nën vëzhgimin e hetuesve mes pronarit të lokalit dhe Gazmir Preçit në një lagje të Tiranës, i cili ra në grackën e kolegëve sapo mori një pjesë të parave. Kryekomisari akuzohet për “Shpërdorim detyre” dhe “Korrupsion pasiv”. Ndërkohë ai është shprehur se nuk e dinte se në pako para ndërsa theksoi se shkoi të takonte pronarin e biznesit sepse ia kishte kërkuar ai atë takim.

“Kërkoj një masë më të butë, pasi jam baba i tre fëmijëve. Nuk e dija fare se në pako kishte para. Kam shkuar vetëm se më ka kërkuar pronari i biznesit. Nuk e dija se kishte lekë brenda zarfit dhe në momentin e arrestimit kam kërkuar që pakoja të hapet në praninë e avokatit, gjë e cila nuk më është mundësuar.”, u shpreh ai.

gazmir preçi gjkko