I ofroi Nuredin Dumanit me 120 mijë euro që të vriste gruan, Apeli i GJKKO liron nga burgu avokatin Alban Bengasi

Alban Brengasi

TIRANA- Apeli i GJKKO ka lënë të lirë ish-avokatin Alban Brengasi. Ish-avokati u arrestua më 7 shtator të 2023 në aeroportin e Rinasit, teksa kishte mbërritur nga Dubai. Bengasi ishte shpallur në kërkim ndërkombëtar në kuadër të operacionit “Plumbi i artë”. Dëshmia e Nuredin Dumanit ngarkoi me përgjegjësi penale avokatin Bengasi i cili i kishte ofruar Dumanit 120 mijë euro për të vrarë bashkëshorten. 

Gjykata e Posaçme e dënoi me dy vite burg Bengasin. Ai u shpall fajtor për akuzën e dhunës në familje në kuadër të grupit të strukturuar kriminal. Duke përfituar nga gjykimi i shkurtuar që është pranuar, Bengasi u dënua përfundimisht me 1 vit e 4 muaj burg, ndërsa SPAK kërkoi dënimin e tij me 4.4 vite burg.

Njoftimi:

Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtar Florjan Kalaja, sot më 27.07.2024, shpalli vendimin mbi çështjen penale nr. 173 akti, datë 25.07.2024 regjistrimi, mbi ankimin e paraqitur nga ankuesi A.B., me objekt: Kërkesë për shuarjen e masës së sigurimit “Arrest në burg”, dhe vendosi:

◦ Konstatimin e shuarjes së masës së sigurimit “Arrest në burg” të caktuar ndaj të pandehurit Z. A.B. me Vendimin nr. 42, datë 17.05.2022 dhe të verifikuar me Vendimin nr. 103, datë 08.09.2023 të Gjykatës së Posaçme të Shkallës së Parë për Korrupsionin dhe Krimin e Organizuar.

◦ Urdhërimin e lirimit të menjëhershëm të të pandehurit Z. A.B. nga ambjentet e paraburgimit, nëse liria e tij personale nuk kufizohet për një shkak tjetër ligjor.

◦ Kundër këtij vendimi mund të ushtrohet rekurs brenda 45 ditëve nga e nesërmja e njoftimit të arsyetuar të vendimit.

gjkko