Investigimi i Piranjave/ Editoriali në "Domani": Jeta luksoze e policëve në qendrat e emigrantëve në Shqipëri, në kurriz të shtetit të Italisë

foto e domani

ITALI- Gazeta italiane "Domani" i ka kushtuar një editorial investigimit të Piranjave, brenda resortit ku janë akomoduar efektivët e policisë italiane në Shëngjin. Efektivët ndodhen në Shqipëri me misionin e monitorimit të dy qendrave që pritet të strehojnë emigrantët, ndonëse ende janë bosh. Deri tani suksesi i vetëm i marrëveshjes është akomodimi i stafit italian të kampeve, shumica policëve dhe karabinierë, në një resort luksi me pesë yje në qendër të Shëngjinit, i quajtur "Rafaelo". 

Gazetarja investigative e "Piranjave", kreu një investigim disa ditor brenda resortit në të cilin janë akomoduar rreth 100 policë italianë dhe ku gjithçka është tepër e kontrolluar dhe e survejuar. Policët italianë kanë treguar pa u menduar dy herë, për gazetaren e maskuar si turiste, se jetesa e tyre në vendin tonë është po ashtu si turistë. "Domani" shkruan se investigimi i Piranjave është e destinuar të shkaktojë diskutime të gjata.

SHKRIMI I PLOTË I "DOMANI": 

Janë javë pasiviteti total për policinë italiane, karabinierët dhe oficerët e burgjeve të dërguar (me një rrogë ëndërrimtare) në Gjadër dhe Shëngjin, në pritje të vendimit të Gjykatës së Lartë për apelimet e qeverisë Meloni kundër mosvleftësimit të ndalimit të emigrantëve në qendrat në Shqipëri. Profesionistët që mbetën për të ruajtur strukturat e ndërtuara në anën tjetër të Adriatikut, në fakt, jo vetëm u kthyen në vigjilentë me kaq shumë kohë në dispozicion për t'u kujdesur, për mburrjen e madhe të revistës së policisë së burgjeve, siç ka ndodhur në Gjadër.

Por ata u vendosën aq shumë sa u ndjenë të lirë të bisedonin me turistët vendas, të cilët rezultuan se ishin korrespondentë të një stacioni televiziv shqiptar. Megjithatë, ajo që doli nga raporti i Piranjat, një program që kujton "Le Iene" në tonin dhe estetikën e tij, është e destinuar të shkaktojë diskutime të gjata.  Sepse pjesëtarët e policisë së dërguar në resortin Rafaelo tregojnë se çfarë konsiston në "misionin" e tyre sot, pa fshehur udhëtimet dhe mbrëmjet në diskotekë: "Na paguajnë që të jemi turistë".

Një humbje parash

“Në këtë zonë ata kanë krijuar një qendër për emigrantët e paligjshëm. Kur mbërrijnë në Itali me varka, i marrim dhe i sjellim këtu. Por tani nuk ka njeri: jemi vetëm ne”, i shpjegon një agjent gazetares së maskuar si turiste.

“Ne jemi siguria e qendrës së emigrantëve, është një marrëveshje: para. Këtu nuk ka njeri sepse azilkërkuesit janë kthyer në Itali. Është humbje parash”, thotë një tjetër.

Më pas dy vajzat ftohen në banjën e resortit ku po qëndron policia. “Ka një sauna, një banjë turke, një xhakuzi, një palestër. Ne e sollëm kostumin”.

Më pas vijojnë historitë se çfarë bëjnë agjentët çdo ditë: "Kemi ardhur për punë, kur nuk punojmë veprojmë si turistë. Na paguajnë që të jemi turistë”, thotë një tjetër. “Dje ishim në Durrës, në Tiranë me skuter, në Shkodër. Qeveria italiane paguan. Të gjitha falas."

Disa prej tyre marrin vesh edhe si funksionojnë diskotekat e zonës: “Na thanë që nuk futesh dot pa vajzat”, thotë një tjetër, duke i ftuar dy “turistet” në një mbrëmje. “Nëse i dashuri juaj është xheloz, na kanë thënë se këtu mund të ketë probleme”.

Agjentët i ftojnë të dyja për një drekë në dhomën e tyre, pasi nuk hyjnë dot në lokalin që është rezervuar për policinë italiane. Ajo që ata nuk dinë është se janë të regjistruar fshehurazi, duke dhënë panoramën e një operacioni të dështuar në kurriz të italianëve.

Qeveria: “Gjykata Europiane do të jetë dakord me ne”

Ndërkohë nga qeveria Meloni vijojnë të mbërrijnë deklarata optimiste për vazhdimin e dëbimeve të emigrantëve në Shqipëri. Ministri i Brendshëm, Matteo Piantedosi, ka marrë kohë duke pritur vendimin e Gjykatës së Lartë për vleftësimin e paraburgimeve: "Procedura ka nisur, të presim të shohim. Kjo është një periudhë në të cilën nuk ka nevojë të ngutshme për të aktivizuar Qendrën. Uljet janë shumë të kufizuara. Le të shohim se cili do të jetë evolucioni dhe më pas do të marrim një vendim”. 

Lajmin e shpërndarë nga Domani për një lukuni të aktivizuar në qendër ende pa të ftuar, ministri e cilësoi  “vetëm një shaka të bukur”.

Në të njëjtin mendim është edhe nënsekretari për drejtësinë, Andrea Delmastro Delle Vedove: “Gjykata Europiane e Drejtësisë sigurisht që do të jetë dakord me ne për çështjen e Shqipërisë, sepse do ta konsideroja çmenduri që Evropa të thotë se nuk ka më kufij”.

gazeta domani marrevesja shqiperi-itali per emigrantet investigimi i piranjave ne shengjin

domani marreveshja shqiperi-itali per emigrantet investigimi i piranjave ne shengjin