Përdoruesit e platformave Facebook, Instagram dhe Messenger kanë raportuar probleme me funksionimin e tyre pasditen e së mërkurës, 22...
AKTUALITET
Kamerat zbuluan atentatin brenda hotelit në Mamurras, Apeli jep vendimin për 25-vjeçarin. Ja me sa vite burg u dënua Klaudio Përkola
PiranjatPërditësimi i fundit 15 Nëntor 2025, 16:40
Gjykata e Apelit ka vendosur dënimin me 25 vite burg për Klaudio Përkolën, i cilësuar si personi që ka ndihmuar në atentatin ku u vranë Bujar Lika dhe Paulin Gjergji.
26-vjeçari u shpall fajtor për “vrasje në rrethana cilësuese”, ndërkohë që më herët janë dënuar edhe ekzekutorët, mes tyre Eduart Lamaj, i cili mbeti i plagosur në vendin e ngjarjes dhe u arrestua teksa trajtohej në një spital privat në Tiranë.
Atentati, i ndodhur pesë vite më parë, solli përpara drejtësisë Eduart Lamajn dhe Ilir Xhepajn, ndërsa Oltion Vlashi dhe Klaudio Përkola vijojnë të jenë në kërkim. Pamjet e kamerave të sigurisë tregojnë momentin kur dy viktimat po konsumonin kafe dhe nga dera e pasme e lokalit futet një person i maskuar, i armatosur me kallashnikov, i cili hap zjarr drejt tyre. Gjatë përplasjes me armë, autori plagoset, ndërsa në skenë shfaqen dy persona të tjerë që e largojnë prej aty.
Në vijim të hetimeve, është zbuluar se atentatorët, të veshur me rroba kamuflazhi dhe me fytyra të mbuluara, ishin transportuar me një automjet që pas krimit u gjet i braktisur në Tiranë. Përmes marrjes në pyetje të pronarit të mjetit, policia ka arritur të identifikojë Përkolën, i cili e kishte blerë makinën për 4 200 euro, dy muaj para ngjarjes.
Pavarësisht pretendimeve të mbrojtjes se Përkola nuk ka qenë pjesë e vrasjes dhe duhej gjykuar vetëm për moskallëzim dhe përkrahje të autorëve, Gjykata e Apelit ka rrëzuar kërkesën, duke lënë në fuqi dënimin e rëndë.
