Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
61 kilogramë kanabis në aeroportin e Rinasit droga erdhi nga Bangkoku
PiranjatPërditësimi i fundit 21 Tetor 2025, 09:43
Policia ka zbuluar detaje në lidhje me kapjen e një sasie prej 61 kilogramësh kanabis në aeroportin ndërkombëtar të Rinasit.
Lënda narkotike ishte e ndarë në 120 pako dhe ishte fshehur në dy valixhe të transportuara nga dy shtetas kinezë, të cilët mbërritën në Shqipëri nga Bangkoku. Sipas autoriteteve, droga dyshohet se ishte trafikuar me qëllim shpërndarjen dhe shitjen brenda territorit shqiptar.
Pas kontrolleve të kryera në pikën kufitare, policia arrestoi në flagrancë dy shtetasit kinezë, njëri 37 vjeç dhe tjetri 48 vjeç. Kanabisi i sekuestruar rezultoi të kishte përqindje të lartë të substancës aktive THC dhe u sekuestrua në cilësinë e provës materiale.
Njoftimi:
Tiranë/ Finalizohet operacioni policor i koduar “Quality”, i zhvilluar nga DVP Tiranë, Policia Kufitare e Rinasit, Njësia e Informacionit për Pasagjerin dhe Drejtoria e Hetimit Doganor.
Goditet një rast i trafikimit të kanabisit me përqindje të lartë THC nga Tajlanda në Shqipëri.
Sekuestrohen 61 kilogramë lëndë e dyshuar narkotike Cannabis Sativa, e ndarë në 120 pako.
Kapen në Rinas, nga Policia Kufitare, dhe vihen në pranga 2 shtetasit kinezë që trafikuan lëndën narkotike, nga Bangkoku, me qëllim shitjen në Shqipëri.
Në vijim të operacioneve të njëpasnjëshme të zhvilluara nga Policia e Tiranës, me objektiv goditjen e rasteve të trafikimit të lëndës narkotike Cannabis Sativa me përqindje të lartë THC, për shitje në Shqipëri, është goditur një tjetër rast i kësaj veprimtarie kriminale.
Bazuar në informacionet e siguruara nga Njësia e Informacionit për Pasagjerin, Policia Kufitare Rinas, në bashkëpunim me Seksionin e Narkotikëve në DVP Tiranë dhe me Drejtorinë e Hetimit Doganor, organizuan dhe finalizuan operacionin policor “Quality”.
Si rezultat i operacionit u arrestuan në flagrancë shtetasit kinezë: -Y. G., 37 vjeç dhe Ch. J., 48 vjeç.
Këta shtetas u kapën në flagrancë në hyrje në Rinas me 2 valixhe me rreth 61 kilogramë lëndë të dyshuar narkotike Cannabis Sativa me përqindje të lartë THC, që dyshohet se e kanë trafikuar nga Bangkoku, me qëllim shitjen në Shqipëri. Sasi e kanabisit u sekuestrua me cilësinë e provës materiale.
Vijojnë hetime të thelluara për të identifikuar dhe nxjerrë përpara përgjegjësisë penale, shtetas të tjerë që mund të jenë implikuar në këtë rast.
Materialet procedurale iu referuan Prokurorisë së Tiranës, për veprime të mëtejshme.
