Të shtëna me armë janë raportuar ditën e sotme në Mirditë.
Një person ka mbetur i vrarë, ndërsa nuk dihen r...
AKTUALITET
KLGJ mbyll pa vendim procedimet për dy gjyqtarët e shkarkuar nga vetingu
b.zPërditësimi i fundit 12 Mars 2025, 16:00
Kreu i KLGJ-së Ilir Rusi gjatë një aktiviteti
TIRANË - Këshilli i Lartë Gjyqësor, KLGJ vendosi të mërkurën më 12 mars të përfundojë pa vendim përfundimtar procedimin disiplinor ndaj ish-gjyqtarëve Bujar Musta dhe Ramazan Avdiu, pas shkarkimit të tyre me vendim të formës së prerë nga ana e institucioneve të vetingut të magjistratëve.
Hetimi administrativ ndaj Mustës dhe Avdiut në KLGJ filloi me kërkesë të ish-inspektoriatit të Këshillit të Lartë të Drejtësisë në vitin 2017 dhe u transferua pranë Inspektorit të Lartë të Drejtësisë, ILD-së në shkurt 2021. ILD konstaton shkelje të gjyqtarëve dhe i kërkoi KLGJ-së që të caktojë ndaj Mustës masën disiplinore “ulje e pagës, deri në 40%, për një periudhë jo më gjatë se një vit” dhe “vërejtje publike” për Avdiun.
Por, pasi të dy këto subjekte u shkarkuan nga Komisioni i Pavarur i Kualifikimit, Këshilli i Lartë Gjyqësor vendosi në maj të vitit 2023 të pezullojë procedimet disiplinore deri në përfundimin e procesit të vetingut të tyre. Pas lënies në fuqi të shkarkimeve dhe nga Kolegji i Posaçëm i Apelimit, prej anëtarëve të KLGJ u konstatua se ata e kishin humbur të drejtën për të qëndruar në detyrë e për rrjedhojë nuk kishte më objekt për vijimin e procedimit disiplinor, duke e përmbyllur atë pa një vendim përfundimtar.
Nga ana tjetër, KLGJ vendosi të shfuqizojë vendimarrjen për pezullimin e procedimit disiplinor ndaj gjyqtarit të Gjykatës Administrative Vlorë, Bevis Shehaj.
Inspektori i Lartë i Drejtësisë ka kërkuar në KLGj caktimin e masës disiplinore “vërejtje publike” ndaj gjyqtarit Bevis Shehaj, me pretendimin se ai nuk kishte zbatuar një vendim të dhënë nga KLGJ lidhur me kancelaren e Gjykatës Administrative të Vlorës, si dhe se nuk kishte respektuar dispozitat ligjore dhe nënligjore që rregullojnë organizimin dhe funksionimin e gjykatave
Pas shkarkimit nga detyra të Shehajt në shkallën e parë të vetingut, KLGj vendosi në tetor të vitit 2022 të pezullojë procedimin disiplinor deri në përfundimin e çështjes ndaj tij në KPA.
Gjatë mbledhjes plenare të mërkurën, KLGJ konstatoi se vendimarrja e KPA për pushimin e procesit të rivlerësimit kalimtar për Shehajn e rikthen atë në detyrë. Për rrjedhojë u vendos shfuqizimi i vendimarrjes për pezullimin e procedimit disiplinor dhe u caktua që seanca dëgjimore pasardhëse të zhvillohet më datën 8 prill./BIRN
