Ish-kreu i Autoritetit Rrugor Shqiptar (ARRSH), Gentian Gjyli, dhe ish-drejtori i Korporatës Elektroenergjitike Shqiptare (KESH), Erald Elezi, janë ...
AKTUALITET
KLSH: Bashkia Vlorë në shkelje ligjore në 22 tendera, me fond 6 mln € në kohën kur drejtohej nga Leli e Dredha
PiranjatPërditësimi i fundit 10 Mars 2026, 16:10
Rreth 60 drejtues e zyrtarë të tjerë të administratës së Bashkisë së Vlorës, pjesa më e madhe e të cilëve ende në detyrë, konsiderohen përgjegjës për shkelje në një numër shumë të lartë tenderash dhe procedura të tjera financiare.
Kontrolli i Lartë i Shtetit ka konstatuar të paktën 22 tendera, me vlerë totale rreth 6 milionë euro, të cilat janë kryer në shkelje të ligjit të Prokurimeve Publike gjatë periudhës 2023–2025, kohë kur bashkia është drejtuar nga Dritan Leli dhe Ermal Dredha. Për këta dy të fundit, KLSH-ja thotë se janë përgjegjës për mënyrën e gabuar të administrimit dhe përgatitjes së akteve të nevojshme për disiplinimin e buxhetit të Bashkisë.
Në Raportin Përfundimtar të Auditimit Financiar të publikuar këto ditë, Kontrolli i Lartë i Shtetit kërkon marrjen e masave administrative nga vërejtje deri në largim nga detyra për 41 zyrtarë, mes të cilëve edhe në funksione drejtuese. Ndërkohë, KLSH-ja thotë se janë gjetur në shkelje edhe 16 zyrtarë të tjerë, të cilët janë larguar nga detyra dhe për këta ka vendosur të informojë Departamentin e Administratës Publike për regjistrimin e masave disiplinore.
Audituesit shtetërorë thonë se të gjitha procedurat tenderuese të gjetura në shkelje, me fond limit që variojnë nga 100 mijë deri në 2.5 milionë euro, i janë përcjellë Agjencisë së Prokurimit Publik për hetim të mëtejshëm dhe për marrjen e masave ligjore, si edhe për rikthimin e shumave abuzive në buxhetin e Bashkisë.
Krahas këtyre tenderave, KLSH-ja thotë se janë gjetur shkelje edhe në 12 procedura tenderuese për mbikëqyrjen e punimeve publike, për të cilat ngarkohen me përgjegjësi ligjore ish-drejtuesit dhe titullari aktual i Inspektoratit të Mbrojtjes së Territorit të Bashkisë.
