Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Konfirmimi i prokurorit Ylli Pjetërnikaj merr formë të prerë
PiranjatPërditësimi i fundit 17 Tetor 2025, 14:12
KPA vendosi pushimin e çështjes së vetingut për prokurorin Ylli Pjetërnikaj, pas kërkimit përfundimtar të drejtuesit të SPAK për lënien në fuqi të konfirmimit të tij.
Kolegji i Posaçëm i Apelimit, KPA shpalli të premten më 17 tetor vendimin për pushimin e gjykimit të çështjes së vetingut të prokurorit të Tiranës, Ylli Pjetërnikaj, prej nga mori formë të prerë konfirmimi i tij në detyrë.
Prokurori Ylli Pjetërnikaj u konfirmua prej Komisionit të Pavarur të Kualifikimit më 27 prill të vitit 2023, pasi nuk u gjetën probleme për figurën dhe pasurinë, ndërsa për pasurinë u aplikua parimi i objektivitetit dhe proporcionalitetit. Vendimarrja e Komisionit u ankimua në Kolegj nga Komisioneri Publik, Florian Ballhysa, i cili pretendoi se nuk ishte arritur të provohej e kundërta e barrës së provës, lidhur me të ardhurat e deklaruara nga subjekti para fillimit të detyrës, se ishin përfituara nga ferma bujqësore e blegtorale që zotërohet prej familjes së origjinës.
Drejtuesi i SPAK u qëndroi në parashtrime shkaqeve të ankimit, por gjatë bisedimeve përfundimtare u paraqitën konkluzione të ndryshme, duke vlerësuar se pasaktësitë e konstatuara nuk mund të sillnin penalizim. Në përfundim, u kërkua lënia në fuqi e konfirmimit të prokurorit Pjetërnikaj.
Subjekti shpjegoi se ai nuk ka pasur asnjë kontribut në krijimin e të ardhurave të familjes bujqësore që ka deklaruar, pasi ka qenë i mitur ose në shkollë në kohën kur janë krijuar. Ai nënvizoi se këto të ardhura janë krijuar e deklaruar para fillimit të detyrës dhe se burimet e tyre janë të verifikueshme. Në përfundim, prokurori Pjetërnika kërkoi pushimin e çështjes, ose në alternativë, lënien në fuqi të vendimarrjes së Komisionit për konfirmimin e tij në detyrë.
Drejtuesi i SPAK kërkon shkarkimin e prokurores Mirela Zavalani
Bazuar në kërkimin përfundimtar të drejtuesit të SPAK, Kolegji konstatoi se ka humbur objekti i ankimit, e për rrjedhojë nuk ka më lëndë procedurale. Sipaës KPA, vijimi i shqyrtimit me një ankim që ka humbur objektin, do përbënte cënim të procesit të rregullt ligjor. Gjatë shpalljes së vendimit u konstatua fakti se kur Kolegji e pushon çështjen, vendimarrja e Komisionit konsiderohet se ka marrë formë të prerë.
Në përfundim u deklarua se, me shumicë votash, është vendosur pushimi i çështjes që ka të bëjë me ankimin e Komisionerit kundër vendimit të KPK për konfirmimin e prokurorit Ylli Pjetërnikaj. Vendimi i KPA është përfundimtar dhe ka efekt të menjëhershëm.
Pjetërnikaj përfundoi studimet në Shkollën e Magjistraturës në vitin 2014 dhe ka punuar si prokuror në Kukës, Shkodër Lezhë dhe në Tiranë. Ai është angazhuar në mësimdhënie në Fakultetin e Drejtësisë dhe në disa institucione arsimore private. Aktualisht është pedagog pranë Shkollës së Magjistraturës./ BIRN
