Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
AKTUALITET
Konsumoi fotoksinë para godinës së SPAK, 63-vjeçari ndërron jetë në spital
r.llPërditësimi i fundit 3 Korrik 2024, 08:33
pal trashaj
TIRANË- Ka ndërruar jetë në spital 63-vjeçari, Pal Trashaj para godinës së Prokurorisë së Posaçme. 63-vjeçari, sipas burimeve nga Qendra Universitare Nënë Tereza, ka ndërruar jetë mëngjesin e sotëm. Pal Trashaj i cili njihej si historian në qytetin e Lezhës kishte rënë viktimë e mashtrimeve financiare me mikrokreditë. 63- vjeçari, i cili ka mbajtur dhe postin e kreut të PD-së në këtë qytet, 2007 - 2009, kishte denoncuar disa herë kalvarin me kredinë e marrë që më pas u shumëfishua deri në bllokimin e pasurisë. Para se të konsumonte lëndën helmuese, Trashaj kishte kërkuar takim me kryeprokurorin Altin Dumanin.
“Kam kallëzuar zyrtarë të lartë, ish ministra e deputetë dhe këta të SPAK ma kthyen, nuk pranojnë këta të hetojnë. Kërkoj takim me Altin Dumanin, nuk më presin. Kam dokumenta që do tua lë mjekëve para se të vdes”, tha Trashaj.
Pasi 63-vjeçari u dërgua në spital, për ngjarjen e rëndë reagoi dhe SPAK. Sipas prokurorisë Trashaj është paraqitur tek oficeri i informacionit dhe ka kërkuar takim me një nga hetuesit e BKH-së për një çështje e cila pas verifikimeve ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022.
Njoftimi i SPAK vijon duke sqaruar se ndërkohë që oficeri i informacionit ka marrë kontakt me hetuesin e çështjes, qytetari ka dalë jashtë në oborr, duke mos ardhur për të marrë përgjigje. Sipas njoftimit, vetëm pas disa orësh jashtë ambienteve të SPAK, janë parë shërbimet spitalore të urgjencës dhe aty është mësuar rreth veprimit të ndërmarrë nga 63-vjeçari.
"Në lidhje me incidentin e sotëm të qytetarit Pal Trashaj të ndodhur jashtë Prokurorisë së Posaçme, institucioni ynë i uron z. Trashaj shërim të shpejtë! Sqarojmë se qytetari në fjalë është paraqitur tek oficeri i informacionit dhe ka kërkuar takim me një nga hetuesit e BKH-së për një çështje e cila pas verifikimeve ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022.
Më pas oficeri i informacionit ka bërë me dije qytetarin të presë sa të njoftojë hetuesin e çështjes mbi kërkesën e tij. Ndërkohë që oficeri i informacionit ka marrë kontakt me hetuesin e çështjes, qytetari ka dalë jashtë në oborr, duke mos ardhur për të marrë përgjigje. Pas disa orësh, jashtë ambienteve të SPAK, janë parë shërbimet spitalore të urgjencës dhe aty është mësuar rreth veprimit të ndërmarrë nga z. Trashaj. Institucioni ynë ka bërë menjëherë verifikimet rreth këtij incidenti për të sqaruar çdo veprim të punonjësve të tij.Prokuroria e Posaçme, garanton se do t’i përgjigjet në kohë çdo qytetari me korrektësi dhe në zbatim të ligjit për çështje që janë në kompetencën e saj.", thuhej në njoftimin e SPAK.
