Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
AKTUALITET
Lagjja Gostil 'përmbytet' nga ujërat e zeza, banorët: Kjo është gangrenë, askush nuk na dëgjon!
PiranjatPërditësimi i fundit 6 Dhjetor 2025, 09:38
Në lagjen Gostil të qytetit të Kukësit, situata është bërë e padurueshme. Sa herë që fillojnë reshjet, kolektori kryesor i ujërave të zeza bllokohet dhe rrugët shndërrohen në pellgje ndotjeje. Ujërat e zeza ngrihen në sipërfaqe dhe përhapen deri pranë banesave, duke krijuar një rrezik të drejtpërdrejtë sanitar.
Banorët thonë se kjo është kthyer në “realitetin e hidhur” të zonës, ndërsa institucionet përgjegjëse nuk kanë ndërmarrë asnjë zgjidhje konkrete.
“Ujërat e zeza na dalin në rrugë çdo herë që bie shi. I jemi drejtuar Ujësjellës Kanalizime Kukës për zgjidhje, por situata vazhdon njësoj. Kjo është bërë gangrenë për lagjen tonë.”
Era e rëndë dhe ndotja janë bërë të padurueshme, ndërsa rreziku për përhapje sëmundjesh infektive rritet sa herë që reshjet shtohen.
Banorët paralajmërojnë se kjo situatë nuk është më vetëm çështje komoditeti, por një problem serioz shëndetësor.
Pavarësisht ankesave të përsëritura, lagjja Gostil mbetet e pambrojtur. Defekti i kolektorit vazhdon të lihet pas dore, ndërsa banorët shprehen se ndihen të braktisur nga institucionet që kanë për detyrë të garantojnë kushte minimale jetese.
Derisa të ndërhyhet me një projekt të qartë teknik, çdo reshje shiu e kthen zonën në një vatër ndotjeje dhe rreziku, duke e lënë Gostilin nën kërcënimin e përhershëm të ujërave të zeza.
