Makina e përdorur nga autorët për vrasjen e Viktor Bardhit në Mirditë është gjetur. Pak minuta pas vrasjes së Bardhit ...
AKTUALITET
LISTA/ Strategjia e SPAK për parandalimin e krimeve zgjedhore, ja emrat e prokurorëve që do dalin në terren gjatë fushatës
M.B.Përditësimi i fundit 30 Janar 2025, 18:10
TIRANA- Janë zbardhur emrat e 12 prej 20 prokurorëve të SPAK që do shpërndahen në 12 qarqet e vendit, duke krijuar atë që konsiderohet si “Task-Forca” për parandalimin e krimeve gjatë fushatës elektorale. “Task-Forca”, do ketë një periudhë funksionimi që do vijojë për 3 muaj me radhë nga muaji shkurt 2025, deri në muajin maj 2025.
Në krye të kësaj Task-Force do qëndrojë kryeprokurori Altin Dumani, ndërsa për kryeqytetin janë caktuar të monitorojnë krimet elektorale zv/drejtuesi i SPAK dhe drejtuesi i seksionit të krimit të Organizuar, Adnand Xholi dhe Drejtuesi i seksionit kundër korrupsionit dhe krimit ekonomik, Klodian Braho e së bashku me ta edhe Dumani.
Gazetarja Anila Hoxha raporton se në Gjirokastër është caktuar si prokuror koordinator Arben Kraja, në Elbasan, Ols Dado, në Shkodër Dritan Premçi, në Kukës Anita Jella, në Berat, Behar Dibra, në Durrës Ervin Kondili, në Fier Doloreza Musabelliu së bashku me Sotir Kllapin në Dibër Ervin Gokaj dhe në Korçë, Vladimir Mara.
Të gjitha këta prokurorë gjatë periudhës 3 mujore do të kenë takime dhe zhvillojnë mbledhje me Drejtoritë dhe strukturat policore të qarkut ku kanë emëruar si koordinatorë special. Qëllimi i takimeve, do jenë për ngritjen e një pune operative me qëllim evidentimin e rasteve, ku ka tendencë për blerjen e votës nga elementët e subjekteve politike.
