Ndërhyrje në rrugë dhe stokun e banesave, FSHZH 30 mln euro për 4 rajone

Foto ilustruese

TIRANË- Tre procedura prokurimi të ndryshme që kanë në objekt të tyre ndërhyrje në stokun e banesave apo shtresat asfaltike në disa rajone në vend janë çelur këtë të martë nga Fondi Shqiptar i Zhvillimit.

Fondi limit total për të treja këto procedura është rreth 2.9 miliardë dlekë apo rreth 29 milionë euro. Në dokumentet që shoqërojnë procedurat jepen edhe detaje mbi këto ndërhyrje teksa FSHZH më herët zgjodhi bashkitë apo zonat që kanë nevojë për ndërhyrje sipas paraqitjes së interesit që bënë këto të fundit. Por çfarë parashikojnë specifikisht kontratat?

Në kontratën e parë objekti i kontratës është “Rigjenerim urban i stokut te banesave, Rajoni 1 (Faza III) me një fond limit 416 milionë lekë.

Në kontratën e dytë “Ndërhyrje për përmirësimin e shtresave asfaltike, Rajoni 1 dhe 2 (Faza IV) fondi limit është 1.24 miliardë lekë dhe po kaq është edhe në kontratën tjetër “Ndërhyrje për përmirësimin e shtresave asfaltike, Rajoni 3 dhe 4 (Faza IV)”.

Sipas FSHZH qëllimi kryesor i projektit në fjalë që parashikon ndërhyrje në stokun e banesave por edhe në rrugë është rritja e cilësisë së jetës së komuniteteve që popullojnë zonat urbane, lidhja e zonave turistike që kanë potencial për zhvillimin ekonomik dhe social.

“Ndërhyrjet do përmirësojnë qarkullimin e automjeteve, njerëzve dhe do të rrisë sigurinë e lëvizjes. Ky raport përshkruan rehabilitimin e fasadave duke përdorur sistemin kapot, për rritjen e efiçencës energjitike si dhe rritja e qëndrueshmërisë së objektit për një periudhë më afatgjatë.

Për të rritur cilësinë e jetës së komuniteteve që popullojnë zonat urbane shihen të nevojshme ndërhyrjet që kanë si qëllim rehabilitimin e blloqeve urbane në qytetet kryesore të vendit, për të krijuar një sistem të përmirësuar në të cilin zhvillohet jeta e banorëve të këtyre zonave. Përfituesit do të jenë të gjitha Bashkitë në të cilat do të aplikohet ndërhyrja.

Objekti i punës do të jetë përcaktimi i tipologjive të ndërhyrjeve, kostos së përafërt të ndërtimit, raport dhe specifikime teknike për zëra tip, duke paraqitur disa modele tip tipologji fasade sipas kushteve klimaterike etj. për çdo ndërhyrje të propozuar” nënvizon FSHZH./ Monitor

fshzh banesa